Apesar cu WEB Aruba N.V. rond di 10’or di mainta a adverti cu personal tecnico ta trahando riba tuberianan den area di Calabas y Jaburibari, e awa cu e algun habitante di Calabas y Jaburibari a haya awe mainta a laga nan cu miedo.
WEB awe a pone riba su Facebook un mensahe cu tecniconan ta traha riba tubonan cu tin leak. Pa e motibo aki mester stop suministro di awa, pa haci e trabou.
Despues cu no tabatin awa, ora cu e suministro a bolbe el a spanta un ciudadano di Calabas. Pa cuminsa, e no tabata sa cu nan ta bay keda sin awa mainta. Ta despues el a bin tende cu a pone riba Facebook. Y ora cu awa a yega bek, esaki tabata berde sushi y despues di un rato el a bira blanco, pero no transparente, manera ta custumbra cu ne. “E cos aki no por ta bon. E hendenan mester protesta. E tin basta rato cu el a bolbe y ainda e awa no a bira transparente. E cos aki ta malo pa nos salud,” un ciudadano a yama pa comenta.
