E buskeda pa e ilegalnan cu a huy ta continua pa esnan di Guarda Nos Costa. E accion di buskeda a yega na oido di un of mas ilegal te cu nan a cuminsa entrega nan mes na Guarda Nos Costa caminda cu nan a huy. Asina mes falta hende. Den e buskeda a bay na un adres na Mei Veld cerca di e luga unda ta huur camber di placer pa ora.
A haya un tip cu eynan por haya hende cu a huy recientemente. Ora cu GNC a yega na e lugar na Mei Veld a topa tres homber trahando estilo bodyman riba auto. Nan a sali core y e personal a bay nan tras. Nan a drenta un cas di conocir di nan cu tambe ta mesun nacionalidad pero cu status legal. Ora cu e ilegalnan a drenta e cas a spanta un criatura cu tabata den e cas. El a cuminsa yora hasta. E personal di GNC a papia cu e doño di cas cu na prome instante a bisa cu ningun hende a drenta su cas. Ora cu a mustre riba e consecuencianan, el a cambia di pensamento y a laga GNC bay busca e ilegalnan den su cas.
A haya porta di camber na lock y e ilegalnan den e camber. A pidinan basta biaha pa habri e porta. Finalmente a habri e porta y hasta eyden un di nan a busca manera di sconde bou di cama. A bay cu tur tres. Prome cu esey e casa di e homber biba na e cas y tambe e suegra a yega cuestiona GNC di spanta su yiu. A mustre cu ta e ilegalnan cu nan ta sconde eynan ta esnan cu a causa e susto na e criatura. A mustranan tambe cu nan lo bay haya un multa administrativo pa laga e ilegalnan traha y cu nan conocimento. Parce e señora ta un docente y e mester sa miho. GNC no a pasa un rato agradable den nan accion na Mei Veld. Na oficina a cuminsa investigacion riba e status di e tres ilegalnan.
A resulta cu tur tres a drenta cu boto recientemente. Ademas di esey un di nan a ser deporta dos biaha caba. E accion di GNC lo sigui y esnan cu sa paradero di esnan cu a huy, bon pa bisanan entrega nan mes prome cu GNC yega riba nan.
