Diaranzon tabata tin e traspaso oficial di e cartera di enseñansa, despues cu e huramentacion di e minister a tuma luga, pero e ex minister no tabata na Aruba. Den un forma oficial a reuni basta largo. Segun minister dr. Lampe, ta importante e parti di continuacion den gobernacion. No ta kere ta responsabel ora cu un Gobierno a cambia di signatura, cu tur cos tin cu cuminsa di nobo, al contrario, ta uza fondonan publico y ta proyectonan cu ta andando. E minister a aprecia cu sra. Hooyboer a tuma su tempo y a haci e preparacionnan necesario pa duna splicacion di e proyectonan cu ta andando pa asina aki, na momento cu ta asumi e responsabilidad aki, tin continuidad di gobernacion y ta un forma di expresa respet pa e placa di pueblo pa anda di un manera responsabel pa esaki.
Proyectonan cu lo haya prioridad
Minister dr. Lampe a comenta cu proyectonan cu ta andando caba, sigur lo bay duna e sosten pa esaki continua. Esey ta e forma mas responsabel pa no comete ningun tipo di capital vernietiging y a haci pregunta riba e parti di digitalisacion di enseñansa, cu eynan lo ta prioridad maximo di su banda, mirando e timeline cu ya pa luna di December mester bin aprobacion di parti di minister di enseñansa y di finansas, pa asina haci uzo di fondonan cu ta disponibel pa e parti aki. Esey ta e futuro rond mundo y pa Aruba tambe, pa nos enseñansa drenta full speed den e era digital.
Con e ta canando
E parti aki ainda no ta den ehecucion. E ta presupuesta si, pero cu eseynan ta fondonan cu ta disponibel cu mester bay rapidamente aproba.
Ampliacion
A papia tambe di e parti di infrastructura cu en berdad tin un lista largo di scolnan cu mester di atencion pa loke ta renobacion pa e situacion fisico di e scolnan aki, entre otro a wordo menciona e scol cu e minister a menciona, esta St. Aloysius cual ta riba e lista. En berdad si por wak e lista largo di e scolnan, esey ta bay tin un atencion tambe special di parti di e minister.
Renobacion di scol
E minister a menciona cu mester haci un evaluacion kico ta e knelpunten den esaki cu no ta bay suficientemente rapido. E ta uno urgente pa respeta e derecho di nos muchanan riba enseñansa cu esaki ta in place lo mas pronto posibel.
