Diahuebs tabata tin un reunion entre abogado Hose Figaroa y e empleadonan di La Linda, cu ta wardando keto bay riba nan cesantia y tambe nan salario cu ya pa un tempo nan no ta haya, mientras cu nan debenan si no a bira menos.
E trahadonan a haya un informacion di un anuncio importante cu La Linda lo a habri bek. Esaki a bin como un sorpresa pa e empeladonan. Hose Figaroa, abogado di e empleadonan, a splica cu henter e motibo pa e reunion tabata e hecho cu diaranson, cierto declaracionnan a wordo haci den nomber di La Linda ta asumi, aunke cu no ta e director a papia.
Sino e persona cu a papia, a papia den nomber di La Linda, kende a trece varios acusacion dilanti y tambe insinuacionnan. Un di e insinuacionnan cual nan ta haya lamentabel, cu a crea e impresion cu di un of otro forma, cu e trahadonan ta esunnan cu ta culpabel di loke ta pasando.
Esey a haya toch na su luga pa reacciona como cu den e caso aki, e hecho cu e trahadonan, na cierto momento a dicidi pa bay pidi asistencia legal pa asina salvaguardia nan derechonan, esey no ta algo cu por wordo uza den contra di nan.
Segun e abogado, e situacion cu e trahadonan ta aden awor aki, ta un situacion crea door di La Linda mes. Na cierto momento La Linda, na fin di aña pasa a dicidi pa cera su portanan. La Linda no a sigui tur e camindanan legal cu e tabata suppose di a sigui cu na momento cu como doño di trabao kier a stop cu operacionnan, of kier reduci e personal, no a sigui ningun di esakinan. A simplemente manda un carta pa e trahadonan den cual a bisa nan cu nan ta zeg af nan acuerdo di trabao entrante 31 di December. Mesora a indica na nan cu esaki no ta posibel. Despues di esey, toch a scoge pa cera e tienda. En todo caso temporal y a manda tur hende cas.
No mas cu como cu e trahadonan oficialmente tur ta den servicio ainda, tur a keda cu derecho di salario. Despues di esey a acuminsa un negociacion cu e abogado cu e tempo ey, tabata representa La Linda. E negociacionnan aki a hiba te cu a haci un proposicion di parti di e abogado pa pago di aña di servicio di e trahadonan, pero lamentablemente nunca mas no a ricibi contesta riba dje. No a tende nada mas di La Linda. Loke despues a bin tende for di den corant, na momento cu a publica na momento cu a duna un surseance van betaling na La Linda.
Por habri si, pero bao di cierto condicionnan. Surseance van betaling ta algo cu pa cuminsa, cu La Linda mes a pidi pe. Pero consecuencia ta cu bo ta wordo poni bao di control di un bewindvoerder. Un bewindvoerder ta controla kico bo ta haci cu tur e fondonan, tur e entradanan di un empresa. Den e caso aki di La Linda. E bewindvoerder su trabao ta pa wak pa e placanan wordo uza pa paga debe pa evita cu e compania por bay over pa wordo declara den bancarota.
Na momento cu e surseance a wordo duna, no por tabata otro cu e control ey mester a tuma luga. Por a compronde cu na cierto momento, esey no lo a cay den bon tera, cerca La Linda, pero ta un situacion cu nan mes a crea, door di a scoge na bay over na un surseance.
Si scucha na e declaracion no ta yega na otro conclusion cu ta e trahadonan a crea esaki. Pero no ta e trahadonan a pidi un surseance. E surseance a wordo pidi pa La Linda mes. E ultimo cos cu tabata tin, ta un proposicion cu a wordo manda pa yega na un areglo y no a haya ningun contesta.
Abogado Figaroa a splica tambe cu normalmente den caso cu como dunado di trabao kier bay cera of kier bay retira algun personal, ley ta prescribi cu tres luna delanta tin cu entraga un plan social na departamento di labor, pa wak si ta duna un permiso pa kita hende for di trabao, si of no. Den e caso aki nada di esey a wordo haci. A manda un carta bisando e hendenan cu nan lo bay cas. For di eynan cos a bay malo. Segun Figaroa, e relacion entre abo y trahadonan ta wordo regula door di ley. Si bo ta kies pa esey, bo no por ta asina cu despues bo ta bisa cu ta aplica ley ora cu ta cumbinibo. Bo tin cu aplica ley bao di tur circunstancia.
Diahuebs mainta a combersa cu un abogado nobo cu ta representando La Linda. Di su parti a indica cu ta purba di yega na un areglo. Di parti di Figaroa a indik’e cu tin un proposicion cu ta riba mesa inda, cual e abogado sa di dje. El a wordo informa mas den detaye tambe di kico e proposicion ta cu tin riba mesa. Eynan ta unda cu tabata. Si La Linda ainda kier reacciona riba e proposicion ey, ta dispuesto pa papia. Pero ta importante pa yega na un areglo cu ta realistico si. E trahadonan tin un derecho, pero e mester ta asina si cu e derecho ey of loke sea ta e pakete cu yega na dje, wordo paga.
E otro opcion ta cu e compania ta bati bancarota, pero den e caso aki, en todo caso, tin e siguransa si cu SVB e ora ey ta paga e placa di cesantia. No por ta asina cu ta cera un acuerdo cu ta den desbentahe di e trahado.
Tin mas of menos 6 trahado cu ta trahando ainda. En total ta papiando aki di mas di 40 trahado, cual ta representa 35. Tin un grupo chikito cu no tin representacion. Tin algun di e famianan cu tambe ta forma parti di e trahadonan. E grupo cu ta na cas, cu excepcion di Februari cu nan salario a wordo paga pa e bewindvoerder, ni e salario di Januari, ni e salario di Maart no a wordo paga.
Pa loke ta e prijskaartje tin, pero e no ta mucho halto. La Linda tin hendenan berdad cu hopi aña di servicio, pero no ta salarionan halto. Ta salarionan relativamente abao. No ta un prijskaartje cu no ta core den miyones.
Esey ta loke ta lamenta, cu di parti di banda di e trahadonan, aunke e situacion tabata fastioso, a duna toch di nan banda pa purb di yega na un areglo realistico y un areglo pagabel. Pero di parti di La Linda a dicidi pa scoge a bay haci trikinan legal, unda cu a bay core pidi un surseance pa purba di evita kisas pa kere cu e trahadonan lo manda pa e compania bay failliet. Pero despues no a realisa kico e consecuencianan di un surseance lo ta. Awor aki ta bisa cu nan no ta di acuerdo cu e forma cu e surseance ta canando. Ta asina e ta caba.
Ultimo mensahe cu a duna na e abogado di La Linda ta cu ainda nan ta habri pa combersa. Ta habri ainda pa yega na un areglo. E mester ta un areglo husto si pa wordo paga na un tempo realistico na e trahadonan.
Departamento di labor, den caso cu pidi retiro di e trahadonan, e ora departamento di labor tin un rol. Den e caso di La Linda, no a haci esey. Departamento di labor na cierto momento tabata envolvi den esaki, tabata purba di intermedia pa nan haya pago. Pero cierto momento prome cu e empresa a cera su portanan, tabata tin intentonan di loke tin di compronde, cu a wordo haci pa yega na algo. E tempo ey e salarionan no tabata wordo paga na tempo, tabata tarda pa paga, etc.
Legalmente awor aki, loke tin ta pa sigui na mesa of keda pendiente pa wak kico ta pasa dia 12. Tin un peticion pa bancarota. Den caso cu yega na un bancarota, e ora ey un cos cu tin positivo pa e trahadonan ta, cu na e momento ey, nan por bay claim e placa di cesantia na SVB. Di un otro banda si La Linda kier keda existi, e ora ey su unico opcion ta pa yega na un areglo cu e trahadonan. Sino, no ta mira con ta bay convence un hues pa e no declara bancarota. Pa e no declara bancarota, mester por tin un plan realistico di con ta bay resolte e problemanan financiero.
Den e caso aki, si no tin di kiboca, di parti di e bewindvoerder, por duna un conseho cu no tin otro alternativa, segun abogado Figaroa.
