Awe mainta trahadonan di e departamento di mantencion y tambe Service & Repair di AMC Unicon, a pone trabao abao. Sindicato STA tabata tey presente pa duna sosten na e trahadonan.
Diego de Cuba, presidente di e sindicato a mustra cu e compania AMC Unicon no ta cumpli, vooral pa e parti tecnico, cu locual a firma casi seis luna pasa. Den un protocol, caminda a delinea cu compania, hunto cu e sindicato, tin cu sinta na mesa tur luna pa evalua e situacion. A ripara cu cos no ta canando manera debe ser y casi seis luna caba tin cu trek na e bel.
Tin situacionnan manera personal, cantina cu nan tin no ta adecuado, a priminti di dreche mas di seis luna pasa y ainda nada no a wordo haci. Tin cosnan firma den e protocol cu tin cu cumpli cune, manera 0% ziekteverzuim cu nan mester a paga y no a page. Asina aki tin como 12 punto cu a delinea den un carta pa gerencia di AMC Unicon, cu e trahadonan no ta mucho contento cun’e. Aparte di esaki, tin vehiculonan cu no ta den bon estado y tambe cu ta falta di mantencion, cu tambe tin cu drecha. A bisa tambe cu ta sinti falta di un gevaren premie, mirando cu e trahadonan ta traha cu coriente halto. Y asina aki tin mas punto cu a trece dilanti den e carta y a bisa gerencia tambe cu lo ta prudente pa sinta na mesa mas pronto posibel y si nan ta desea esey, tin espacio pa sinta awe mes na mesa, pero te asina leu STA no a ricibi ningun contesta di parti di gerencia. Nan a wordo poni na altura debidamente, conforme key. Mester informa nan cu e trahadonan ta bay den un accion, ta loke STA ta haci tur ora y esaki no ta un excepcion. Ta spera cu por mira un solucion riba un tempo corto pa locual ta e problemanan andando awor aki, vooral den e parti di tecniconan di AMC unicon.
Oido
De Cuba a splica cu despues di e accion aki, oido lo bin sigur sigur. Si no haya oido, chens ta hopi grandi cu lo intensifica e accionnan of lo tin di acudi na oficina di Mediador di Gobierno, pa pone gerencia sinta na mesa y yega na solucionnan mas lihe cu ta posibel, pa loke ta e situacion andando.
Walkout
E walkout awe tabata pa awe so, manera cu a anunci’e for di 7’or y mey pa 9’or y mey di mainta. Una bes cu trece tur cos p’adilanti, si e trahadonan kier bay traha bek, lo evalua e situacion y lo reanude un tiki mas tempran, sino lo a bay full e dos oranan tambe.
Gerencia
Na momento cu a notifica gerencia di e walkout, internamente nan tabata hopi preocupa. Pasobra a tende cu tabata tin un core core di otro mundo. Te na momento cu STA a presenta, no a ricibi nada for di parti di gerencia di AMC Unicon. E compania ta draai bon, container ta bin, container ta bay. Ta compronde cu tin hasta un otro edificio na caminda. Trata bo hendenan bon. Trata bo empleadonan manera debe ser. Esakinan ta curason di bo compania. Ta nan ta pone e compania draai.
Hopi wardamento
Shopsteward Farley Jansen a comenta cu actualmente e trahadonan a sinta pa firma un CAO of un protocol, pero ta sinti cu gerencia no ta cumpli cun’e. A manda un carta ayera di e accion di awe. Tabata tin lunanan largo ta warda riba un cantina adecua y den fraccion di seconde ayera, a haya un cantina manera mester ta. Tin problema cu e vehiculonan, tin di nan no ta adecua pa core cun’e. Tin problema riba nan. Ta trek na e bel, pero no ta haya un contesta bek riba dje. Ademas di esey tin cierto cosnan cu ta bayendo robes tambe, cu persecusion di trahado. Desde cu a drenta cu STA, gerencia ta menasa y persigui y esey no ta su luga. Ta un solo compania nan ta.
Jansen ta spera cu Gerencia duna oido, pasobra a purba hopi pa yega na mesa cu nan. A drenta hasta na un acuerdo cu si tabata bon, sinta un biaha pa luna wak con cos ta bay, pero no ta e caso. Esey a haci cu a tene un walkout.
Ta spera cu por pasa riba acuerdonan cu a firma y cu nan por wordo cumpli.
