Directiva di Asociacion di Empleadonan cu un ‘Contrato Laboral Individual den Servicio di W.E.B. Aruba N.V. (VWI)’ a keda babuca di mira publicacion di un anuncio di Utilities Aruba N.V., namens un zogenaamd “Utilities Aruba Group”, cu oficialmente no ta existi manera un grupo di compania registra na Camara di Comercio Aruba. Den e anuncio ta solicita reaccion di companianan di fabricacion/operacion di parkenan di molina di biento pa genera coriente.
Berdad Utilities Aruba N.V. ta accionista di W.E.B. Aruba N.V. y di N.V. Elmar, pero di acuerdo cu nan meta oficial, manera describi den nan statutonan deposita na Camera di Comercio di Aruba, no ta indica of duna como meta cu Utilities Aruba N.V. ta den e negoshi y tampoco tin e experticio tecnico ni comercial necesario pa por saca un solicitacion publico pa expresion di interes pa adkiri y cera un “Power Purchase Agreement” manera proponi den e anuncio den corant.
Tur experticio tecnico, comercial y financiero relaciona cu un proyecto di tal magnitud ta traha na W.E.B. Aruba N.V. y pesey VWI ta cuestiona kico ta e intencion(nan) di Utilities Aruba N.V. pa cu e Expression Of Interest (EOI) aki pa adkiri un PPA di molina di biento sin cu ta W.E.B. Aruba N.V., e compania cu lo mester bay cumpra e coriente, ta lidera e projecto aki. VWI kier sa: Ta ki sorto di deal esaki lo bira? E lo bira un otro “EAGLE”-style deal den cual Utilities Aruba N.V. ta bin dicta y duna instruccion na WEB cu mester sinta na mesa cu un compania cu Utilities Aruba N.V. ta escohe?
VWI kier sa si lo bini un otro “Non-Disclosure Agreement” cu ni Parlamento di Aruba, e organo legislativo mas halto di Aruba, no mag haya pa lesa y studie? Pakico Utilities Aruba N.V. ta saca solicitacion pa “expresion di interes” (lesa ofertanan) pa algo cu Utilities Aruba N.V. no
tin ningun experticio aden y no tin ningun recurso humano cualifica den servicio pa haci tur e evaluacionnan complica cu ta encera un proyecto compleho asina? Pakico WEB, kende si tin e experiencia y hendenan cu e conocimento tecnico y comercial, pa desaroya un proyecto asina di molina di biento no ta lidera e proyecto aki den propio cas di trabou? Pakico Utilities Aruba N.V. ta tuma pasonan di actividadnan comercial di cual e meta stipula den Utilities Aruba N.V. su statutonan no ta menciona y no ta carga? Con VWI tin cu interpreta e “move” aki di Utilities Aruba N.V.?
VWI ta puntra su mes si acaso WEB no ta capacita mas pa lidera proyectonan semehante? Of Utilities Aruba N.V. a contrata un “genio” comercial y tecnico cu sa tur cos y ta hala WEB un banda? Of por tin otro rasonnan pakico Utilities Aruba N.V. ta tuma e paso aki cu no ta conoci pa VWI? E destaho aki lo bira otro “blackbox” for di cual un compania escohi pa Utilities Aruba N.V. ta “pop-up” y WEB ta wordo “instrui” pa bay sinta na mesa cu ne?
Mescos VWI ta cuestiona fuertemente e manera cu e destaho di RDA a tuma luga. E destaho for di cual “EAGLE-LNG” a sali e compania cu a gana e destaho y despues WEB mester a sinta na mesa cu EAGLE-LNG pa cera un contract di compra di gas natural, VWI ta cuestiona e modus operandi aki di Utilities Aruba N.V. pa cu e “destaho publico” aki pa un parke di molina di biento. WEB tabata forma parti di e destaho di RDA? WEB a participa den e escohencia di EAGLE-LNG? Te con leu VWI sa e respuesta na esaki ta “NO”.
Si WEB ta participa den e destaho aki di Utilities Aruba N.V., e pregunta cardinal ta keda: kende lo tin e ultimo palabra riba e decision pa cua compania ta scoge? E ‘laatste woord’ lo ta na WEB of na Utilities Aruba N.V.? E sorto di ‘bokke sprongen’ nan aki cu Utilities Aruba N.V. ta haci ta lanta hopi pregunta! Pregunta manera kico ta e rason real pakico ta Utilities ta lidera e proyecto aki y no WEB?
