Trahadonan di e conocido restaurant Tony Roma’s ta sumamente desapunta den gerencia. Awo cu nan kier cera nan porta, tin entendi cu nan no ta bay haya loke nan merece, mirando cu tin algun empleado cu tin 15, 20 y hasta 25 aña di servicio.
Un di e trahadonan a menciona cu e mes tin por lo menos 18 aña trahando na e restaurant. E ta asina descontento di loke e doño a haci cu tur e empleadonan. Pa e motibo aki mes nan ta bayendo abogado pa mira ki solucion nan por bin cun’e.
E trahado aki mes no a haya ningun indicacion ki dia e restaurant mes ta cera. Pa loke ta e suma cu ta ofreciendo e trahadonan, no ta husto. E trahado en cuestion a bay na e oficina di e abogado y a bisa nan cu nan lo bay haya cierto suma. E no a firma nada si, pero si el a ricibi un documento cu ta specifica kico nan lo bay haya. Aparentemente nan lo bay pone e suma aki riba su payslip, kitando e impuesto, fuera di e vakantie.
Loke tambe nan a pidi e trahadonan cu tin cu hinca tur stoel y mesa paden.
Lo bay bin un restaurant nobo cual ta Deny’s. E trahado a splica cu te na ultimo ta e mesun persona ta maneha esaki. Nan a mira un potret cu nunca di su bida el a wak. Semper el a wak sr. Milton Berlinski cu ta na cabes. E mes nunca a bin duna cara pa loke ta e situacion. Semper e ta manda un otro persona.
Deseo di e trahado ta pa haci husticia y pa tur esnan haya loke nan merece y naturalmente, haya nan trabao bek.
Varios di e trahadonan a haya oferta di trabao. E trahado particular aki mes, nan a yam’e pa bin oficina di un abogado. Eynan el a bisa e abogado cu loke ta sosode cu nan, no ta husto. No ta husto cu nan ta keda sin trabao y nan no kier paga nan tampoco. Na e oficina di abogado, no a wordo treci p’adilanti cu e otro operadornan lo bin tuma over e negoshi hunto cu e trahadonan.
Un otro trahado a remarca cu durante su carera na e restaurant, hopi cambio a tuma luga. E persona aki mes a cuminsa cu e restaurant, por lo menos 25 aña. E mes no a haya ningun carta. Nan a bay oficina di labor si pa asina cana nan caminda. E mes nan a ofrece Hilton, pero cu e condicion cu e ta perde tur su añanan di servicio. Tampoco si nan pag’e, e no por solicita bek. Tur esaki a wordo treci padilanti na oficina di labor. Si mira bon, con cu bay bin e trahado ta perde.
Lo unico cu e trahado aki bek, pa nan pag’e loke e merece, manera cu ley ta stipula.
Cu 25 aña di servicio nan kier page solamente 10 mil florin, cual esey no ta yega ni su cesantia, cual e tin cu haya, e trahado a conta, kende a laga calcula e suma for di su payslip. Tin coleganan cu tin 15 y 20 aña. Algun di nan ta haya 5000 y hasta 1200 florin, cual den su opinion, ta un insulto grandi. Y riba dje, e doñonan mes no a bin duna cara. Ta un abogado di Corsou a tuma contacto cu nan pa asina papia cu nan.
Segun un otro trahado, e hendenan aki no a ni worry cu labor y a gewoon tira algo pa asina trece un smile riba cara di e empleadonan. Pa loke ta e minister di labor, Glenbert Croes, mesora a presenta na e sitio y a sigura e trahadonan cu pa e siman siguiente algo lo bay wordo haci. E minister a menciona cu durante tur e añanan aki nan a gana hopi placa. Esaki no ta e danki cu ta duna e trahadonan.
Den e Aruba di awe cu nos ta kere aden, e minister ta kere cu trahadonan di e Aruba cu nos ta kere aden, mester wordo miho paga y miho corespondi. Den momentonan cu cos por a bay dificil pa Tony Roma’s cu ta yega na su final, e ta sigur cu tin placa pa duna nan. Un miho propuesta cu ta coresponde na tur e añanan di servicio cu e trahadonan tabata tin y cu e salario. No solamente si a gana salario minimo, sino loke a gana totalmente mester ta corespondiente. E minister a menciona cu e por interveni den impedi e doño di Tony Roma’s trata e trahadonan e manera cu e ta haciendo. E minister ta tumando contacto cu e director di departamento di labor. Manera cu a interveni pa percura pa e trahadonan di Citgo pa no kitanan for di trabao, por pone un presion riba Tony Roma’s y su doñonan pa nan cumpli cu un miho pakete cu ta husto. Cu husto kier men, cos sigur. Sigur nan mester bay di acuerdo cun’e. Pero tambe e trahadonan mester bay di acuerdo cun’e. Y loke no bay di acuerdo cun’e, no ta husto. Husto ta, bon pa nan, bon pa e trahadonan.
Minister Croes a splica cu ta hopi importante loke e trahadonan a haci, di bringa pa nan derechonan, pa nan añanan, pa nan famianan, pa nan compromisonan y en todo caso gobierno ta para na banda di e trahado, e minister a menciona por ultimo.
