SVb a tuma nota den prensa cu directora di Registro Civil (Censo) a cuminsa eherce e autoridad cu ley ta dun’e pa actualisa registro civil.
Pa SVb registro civil ta un base di informacion importante y ta mira e desaroyo cu e directora a cuminsa di actualisa y mantene esaki actualisa. Ora ta papia di actualisa ta referi na momento cu un persona sali for di e isla y keda un tempo pafo, ta saca e persona aki for di e registro.
Tin 3 motibo cardinal pa cual un sistema di registro actualisa ta importante pa SVb, asina Ing. Edwin Jacobs, director di SVb, a bisa. Primeramente tin e parti di asegurado y e ley di AOV ta bisa cu cada persona cu ta den e registro civil, ta acumula derecho riba AOV entre e edad di 15 te cu edad di pension cu ta di 62 aña. Cada aña cu un persona gana e derecho y no ta biba na Aruba, e ta hayando un beneficio cu e no tin derecho riba dje. P’esey ta importante pa e registro civil ta actualisa y e personanan cu no ta biba na Aruba segun loke ley ta rekeri pa por considera como ciudadano y ta parti di e registro civil, no tin e derecho aki.
Pa cada aña cu e situacion ta asina ey, e ta costa e fondo 4150 florin. Si den 1 aña tin 100 hende ta afo pero ta registra, esaki lo costa como 400 mil florin di cual no lo perhudica e fondo awo pero den futuro na momento cu e ta pensionado. Si tur aña e suma ta di mey miyon pa 1 miyon, cu tempo lo tin un suma basta bon cu e fondo tin di bay carga cun’e siendo cu e persona no tabata na Aruba como su luga di biba principal. Pa SVb y e seguro di AOV ta hopi importante e distincion aki ta actualisa y asina aki e asegurado ta haya e derecho.
Pensionado cu ta bay biba den exterior
Na momento cu e pensionado ta biba den exterior, e tin obligacion di entrega cada 3 luna un constancia cu e ta na bida. Esaki ta pa SVb sa cu e ta pagando un beneficio na un persona cu tin derecho riba dje cu ta na bida. Un persona cu sali for di e isla y ta keda registra den e registro civil y SVb mira esaki, nan ta asumi cu e persona ta na Aruba y na bida. Si e persona aki fayece den exterior, e ta keda cobra e pension siendo cu e no tin derecho riba dje pasobra e no ta na bida mas. E situacion aki a yega di pasa caba, di cual ciudadano ta inscribi na registro civil y a sali bay afo ta fayece. Na momento cu SVb a haci cierto controlnan, a bin constata cu e persona tin par di luna morto y e no tabatin derecho di a cobra e pension. Pa bay mira ken a cobra e pension, esaki ta un situacion cu nan no ta sali afo.
Registro civil actualisa ta importante
Ta importante cu oficina di Censo ta mantene e registro civil actualisa, di biaha nan ta ricibi e notificacion cu e persona aki ta saca for di registro civil. Asina aki ta pone riba e lista cu e mester entrega un constancia di bida. E ta sumamente importante pa SVb evita di paga pension na personanan cu nan a asumi ta na bida, pero a bay for di isla of biba afo y por a fayece afo. Tur esaki ta trece consecuencia cun’e y SVb ta pagando e beneficio na hende cu no tin derecho na dje.
Acuerdo entre instancianan di Reino
E instancianan di Reino cu ta paga AOV tin un acuerdo riba intercambio di informacion. Nan ta intercambia informacion SVb Hulanda, Corsou, Instituto cu ta haci pension pa St. Maarten. Pa esaki e base di intercambio di registracion ta e registro civil, segun ing. Jacobs. A haci e registro civil un sistema automatico di cual ta notifica cu tal persona ta na bida ainda y ta notifica SVb Hulanda cu e persona ta bibando na Aruba, siendo cu e persona no ta bibando na Aruba. Esaki ta pasa ora cu no tin un sistema bon actualisa.
Esey ta pone cu e calidad di informacion no ta bon. Na momento cu tin un registro civil actualisa, e calidad di informacion brinda ta subi y e confiabilidad di partnernan den informacion ta aumenta. Esey ta fortifica bo posicion y cooperacion den Reino.
SVb ta mirando e fruta di e conexion cu ta pone entre diferente archivo den diferente departamento crucial. SVb ta contento di tin acceso pa mas di 1 aña na e registro civil live, di cual nan por haci nan mesun control. Ainda falta e stap cu Censo di e notificacion automatico di fayecimento, entrada y salida di cual lo yega na esaki. SVb ta satisfecho di e servicio cu nan ta ricibi for di Censo compara con esaki tabata den pasado. A yega asina leu den e relacion cu Censo, di cual ta suministra SVb prome cu e aña cuminsa un lista di nomber di tur hende den registro civil cu e aña siguiente ta bin na remarca pa pension. SVb ta sacando un carta adelanta p’e aseguradonan cu ta bay bira pensionado informando cu nan ta bay bin na remarca pa haya pension di biehes. Na mes momento ta informa nan riba e uzo di e sistema digital pa haci peticion.
