Den un conferencia di prensa cu a tuma luga awe mainta, DOW a amplia riba locual ta e restauracion di nos santo blanco riba nos lamanan. Director di DOW, ir. Marlon Croes a inicia su discurso gradiciendo e ekipo di trabou y minister president pa e confiansa y motivacion pa traha riba e patrimonionna cultural y historico riba Aruba como tambe pa aloca e fondonan corespondiente na esaki.
Asina Croes a bin ta recorda cu ta na 2020 a institui e grupo Aruba Amenities pa traha riba e mantencion y renobacion di e patrimonionan nacional, natural y historico y cu esaki mester forma parti di e strategia di gobierno. Riba nan agenda tabatin pa renoba nos beachnan, pues esaki ta nos materia prima pa turismo y na 2021 a aloca un suma pa realisa esaki y a cuminsa acumula santo blanco pa cuminsa prepara esaki pa asina drecha e beachnan.
E prome beach pa pasa door di restauracion tabata Arashi, aki a hiba no menos cu 560 yarda di santo blanco, tambe a drecha e drenahe di awa. E di dos beach tabata Boca Catalina, caminda a hiba 160 yarda di santo blanco y despues a inicia e trabou riba Eagle Beach, di cual e aña aki ta bay termina esaki.
Na su turno minister president mr. Evelyn Wever-Croes a expresa cu a pesar cu Aruba ta pasando den un otro ola, semper mester keda enfoca riba futuro y esey ta netamente locual a haci den e caso aki. Cu esaki, kier sigui lucha pa bienestar di nos pais y e recuperacion economico. Esaki ta un iniciativa pa cuminsa cu programa di renobacion den area di facilidad y asina crea oportunidad nobo den nos comunidad.
Desaroyo di producto turistico
Mirando cu e proyecto aki tin di haber cu nos turismo, CEO di ATA, Ronella Croes, tambe tabata t’ey presente pa asina expresa kico esaki ta nifica pa Aruba. Asina el a bisa cu ta bon pa refleha riba kico ta encera un strategia pa desaroyo di nos turismo. Un di esunnan primordial ta un promocion internacional fuerte y mas cu claro pone atencion riba nos producto turistico.
Den cuadro di esaki, ATA ta evalua ki beneficio cada proyecto tin pa nos comunidad, pa nos bishitantenan y tambe ta wak con por mitiga e impacto riba medioambiente y con esaki ta stimula un desaroyo positivo y por ultimo ki contribucion economico esaki ta trece cu ne. Den tur esaki, mester inverti den e producto turistico pa asina atrea e bishitantenan pa Aruba. A cambio, e inversion aki mester converti den un experiencia p’e bishitante, di cual despues e bishitante mes ta bira un promotor di Aruba.
A splica cu ATA tin algun aña caba ta studia nos lamanan pa asina bin cu mehoracion pa esakinan. A enfoca entre otro riba e calidad di awa, colocacion y mantencion di e boeinan, palapa y awo mas cu claro e santo blanco.
