Departamento di Inspeccion di Salud, IVA ta haya mas of menos dos pa tres keho pa siman. Por ehempel riba Facebook tin hopi keho cu ta drenta riba e orario di espera of no ta haya un cita cu e dokter lihe.
E learning curve ta hopi stijl segun e vocero Francis Rugebregt. Ta siñando cosnan hopi lihe pa ta un organisacion cu a caba di cuminsa. Nan ta haciendo nan best pa tuma pasonan grandi. Awor aki mes ta bezig cu e rapportnan di casnan di cuido. Cosnan ta canando bon, segun Rugebregt. Ainda falta e concientisacion di pueblo pa nan sa cu nan por bin entrega keho cerca nan. Ta trahando riba esey pa yega mas cu spotnan na television, pa hende sa unda nan ta y kico nan ta haci.
Casonan serio
Ora e keho drenta, un parti importante di e trabao di IVA ta pa guia e pashent, esta e persona cu ta duna un keho. Tin diferente caminda cu nan por bay, caminda cu nan por cana, dependiendo di e meta. Nan por bay un medisch tuchtcollege, si nan kier keha un dunado di cuido individual. Aki ta guia nan tambe pa sa ki paso nan tin cu duna, con pa skirbi e carta. Den casonan extremo, si acaso haya un keho drenta y nan mes mira cu e lo por ta cu ta grave, IVA mes por dicidi pa entrega un keho na Medisch Tuchtcollege tambe. Banda di esey tin casonan caminda cu e hendenan kier un compensacion, cual ta un otro caminda pa cana. Tin caso caminda cu e hende kier solamente un despensa. Depende kico nan kier logra, pa asina nan por wordo guia riba e caminda cu nan kier cana.
Tin pashent cu a keda cu un daño por ehempel, tin caminda pa cana, cual un despensa no ta necesario na e momento ey, y ta algo hopi mas serio e ora.
Con entregamento di keho ta cana
Si un persona entrega un keho na IVA, e ora por guia nan pa nan mes entrega e keho na Medisch Tuchtcollege, y tin casonan caminda cu di berdad mester bay Medisch Tuchtcollege, e ora cu nan mes dicidi entrega un keho, eynan e Medisch Tuchtcollege mes ta tuma e keho over cu nan ta check e keho inhoudelijk y ta deliber’e cu un comision cu nan tin, cu ta consisti di personanan cu tabata den e veld medico. Tin pensionadonan por ehempel. Antes e zitting tabata na Corsou, pero awor aki, nan tin nan mesun college na Aruba. Na Maart nan tin un zitting tur luna. E parti di Medisch Tuchtcollege, nan mes ta trat’e internamente, pasobra ta corte e ta bay. IVA si ta haya e veredictonan di Medisch Tuchtcollege, esta kico a wordo palabra, e resultadonan, etc. Aruba tin un hues special pa esey, cu ta deal cu e casonan medico.
Abogado
E persona por bin cu un abogado y ta wordo trata como un caso completo. Tambe Medisch Tuchtcollege ta trahando riba su website pa asina hende duna keho eyriba.
