Gobierno y su ministernan ta den un “pijnbank”. Tur caminda ta preta riba nan. Y esun cu menos atencion a dedica na dje, den tur e añanan tras di lomba, awo ta pasando factura. Gobierno ta den un situacion pa cu su maneho di desperdicio manera medical waste y sludge, y tambe RWZI cu a haya nan mes obliga di haci un peticion na corte pa cuminsa kima cierto materialnan riba ex-dump di Parkietenbos.
E incinerator di Aruba, cu mescos cu RWZI, ta wordo uza pa procesa hopi mas material di loke nan ta destina, ta confronta problema. Ta parce cu gobernantenan no ta traha cu consehero of hefenan di departamento cu vision. Ambos instalacion a sobrepasa nan capacidad. Un RWZI cu ta apto pa procesa 4.500 metro cubico di awa, mientras cu e desaroyo awendia ta procesa casi 10.000 metro cubico di awa sushi pa dia. Mescos a pasa cu e incinerator pa cual el a daña.
Sin e incinerator pa kima e sludge di RWZI y medical waste, esaki a bin ta acumulando durante casi 8 luna caba. A crea un situacion insoportabel. Esaki pasobra e sludge ta keda deposita na e RWZI-nan, causando holo malisimo y musca na cantidad, causando molester entre otro pa Amsterdam Manor. Banda di esaki door cu no por a procesa e desperdicionan menciona, e espacio cu a keda pa warda e materialnan ey ta masha tiki mes. Pues Gobierno ta sinta riba un batata cayente pa cual a dicidi di bay corte pa pidi pa pospone un decision tuma anteriormente.
E incineratorio mientrastanto ta cla. Pero tin e problema cu recientemente, den luna di december, corte a duna e ciudadano Anouk Balentina rason. E makinaria no por funciona sin un permiso di molester y esun cu a duna a bay di un forma robes pa cual e no ta valido. Tur esaki a causa cu mester a pone un paro na e trabounan. Aunke cu a drecha e incinerator, no por uz’e.
Minister di Husticia y Asuntonan Social Rocco Tjon a acerca Hof cu e peticion, cu nan ta yama un “voorlopige voorziening”. Un decision temporal mientras cu ta spera riba e decision final. Minister a apela e decision di 6 di december ultimo, cu a cay na fabor di Balentina.
E mandatario su representante, kende ta hurista di Departamento Huridico, ta pidi Hof pa trata e peticion aki mas lihe posibel, basa riba e puntonan cu ta menciona den nan peticion.
Den apelacion, nan ta bisa, lo duna e informacionnan adicional cu no tabatin y pa cual corte a hala aden e permiso duna na 2020.
E peticion ta bisa claramente cu e RWZI-nan cu awo ta fungi como deposito, den masha tiki tempo no tin espacio mas pa warda sludge y mesun cos ta conta pa unda tin desperdicio medico y karkas. “Esaki ta un situacion di emergencia cu no por wanta mas”.
Pa mas informacion lesa TREMPAN.
