Cu orguyo e maestronan di Tiger Taekwondo Academy ta anuncia cu recientemente nan atletanan a logra gana medaya internacional. E scol di taekwondo a biaha pa Costa Rica, Las Vegas y Pennsylvania.
Den e campeonato na Pennsylvania, Aleysha Macea a logra medaya di plata, Dary Morrel y Sue-Jean Kelly a logra brons. Na Costa Rica e scol a logra gana tres medaya. Maelynn Fradl a logra medaya di plata, Aleysha Macea y Sue-Jean Kelly a logra medaya di brons.
Na Las Vegas tabatin 1500 atleta cu a participa. Aki Aleysha Macea di Aruba a logra e unico medaya di oro. E otro atleta cu a logra medaya tabata Khaleesi Ridderstaat. El a gana medaya di brons.
Tiger Taekwondo ta gradici e atletanan di e delegacion di nuebe participante den tur categoria, entre otro Las Vegas. Esakinan tabata Sara Chirinos categoria adulto categoria -49 kilo, Maelynn Fradl categoria Junior-68, Kaylon Bislip categoria Junior masculino-59, Aleysha Macea categoria Cadete-55 kilo, Sue-Jean Kelly Cadete -44kg, Dary Morel categoria Cadete – 59 kilo, Janoah Ridderstaat categoria Cadete -37 kilo, Khaleesy Ridderstaat categoria infantil- 30 kilo.
Importante ta pa bisa cu no tabatin reunion tecnico ni na Spaño ni Ingles. A establece e reglamentonan actual. Master Teofilo Rodriguez y Jason Ridderstaat ta gradici eternamente cada atleta y nan mayornan pa nan sosten, disciplina y pasion hinca durante di nan estadia na e competencianan aki. Pa luna largo Tiger Taekwondo a lucha pa por a recauda e fondo necesario pa e atletanan por a participa. Danki tur cu a contribui na e scol cu nan donacion na e rotondenan di Piedra Plat y Noord. Awe nan por wak bek y bisa cu tur e esfuersonan tabata bale la pena.
