Diaranson Corte di Prome Instancia di Aruba a trata e caso contra di Alberto Groeneveldt, acusa di a maltrata su cacho Khalisee. E maltrato tabata di tal indole, cu ni veterinario no tabata por a haci nada mas p’e.
Defensa di Groeneveldt, mr. Desiree Croes, a cuminsa na bisa cu, den nan opinion, e caso a bay hopi bon. Den corte defensa di Groeneveldt a haya oportunidad di trece su banda di medaya. Contrario na loke tabata trece dilanti cu tabata trata di un abuso di hopi tempo, pero tabata por a mustra cu e cacho tabata mara for di 21 di maart te cu 26 di maart. Esaki tabata hopi importante, pasobra cu den tur atencion mediatico, no tabatin claridad riba kico a pasa.
Tambe Groeneveldt a haya oportunidad di papia cu hues y trece su banda di medaya, p’asina pueblo por haya sa kico exactamente a pasa. Tabata dia 17 di januari ultimo, Groeneveldt a acerca e fundacionnan pa bin yud’e cu e cacho. Segun mr. Croes, el a haci loke e mester a haci. A pidi e fundacionnan pa bay cu e cachonan, cual no a pasa. Polis di Bario tambe a bin y a pidi nan pa bay cu e cachonan, cual tampoco a pasa. Como doño di e cacho,e ta keda finalmente responsabel.
Ta pensa cu door cu e tabata un cacho nervioso, el a draai rond di e cadena y a haci su mes daño. P’esey el a bisa di cuminsamento, cu e ta tuma su castigo manera cu mester ta. No tabata su intencion, pero como doño di e cacho, e ta keda responsabel.
CASTIGO
Abogado mr. Desiree Croes a splica cu den casonan asina, e persona lo por haya un castigo di te cu seis luna cera. Pero tanto hues como fiscal a tene cuenta cu e circunstancianan, pa cual el a haya 60 ora pa trabou di comunidad, di cual binti ta condicional. Esaki ta haci cu e lo mester traha 40 ora pa comunidad. Tambe el a haya un boet di 750 florin. Den caso cu Groeneveldt no cumpli cu e demanda, e ora si e lo mester bay cera pa un luna y algun dia.
Zoe Konijn, di Luna Foundation a bisa cu nan ta acepta e castigo cu hues a impone. No ta importa e cantidad, pero cu a haya castigo. Si el a haya vrijspraak, e ora tabata diferente.
Konijn a bisa cu loke e no ta acepta, ta cu kier ataca su fundacion. No ta trabou di e fundacion pa rescata tur cacho cu ta wordo maltrata. Door cu e doño no por a cuida su cacho, no ta culpa di e fundacion. E fundacion ta draai a base di boluntario, cu ta pone hopi amor, tempo den loke nan ta haci. Luna Foundation no ta acepta cu kier schuif e culpabilidad riba nan, ta inaceptabel.
Jacqueline Boderie ta contento cu a duna castigo di boet y trabou pa comunidad. E mes a drenta sala di corte sin niun expectativa. Groeneveldt no ta sinti cu el a haci algo fout. Y pa e abogado a acusa Luna Foundation, ta inaceptabel.
No ta parce cu Groeneveldt a duna e puppynan amor, pasobra cu nan tabatin masha miedo mes di tur cos. A dura e fundacion un siman pa por a gara nan. Algo insolito pa wak un caso asina. Si a opera e cacho, awe e caso lo no a yega asina leu.
