Mañan diamars mainta lo tuma luga un reunion yama cu caracter di urgencia door di Gabinete Wever-Croes II. Manera ta conoci, desde diaranson dia 1 di maart 2023, e compania di construccion OHL Arellano Construction Company di Miami a ordena e subcontratistanan pa para tur trabou na e proyecto di renobacion di e edificio conoci pa nos como e “hospital bieu”. Mañan como tal ta net dos siman, 14 dia, cu e trabounan ta paralisa y tur hende ta man crusa ta punta dede riba otro.
E subcontratistanan ALBO Aruba, Bohama, AWM Caribe, Croon y C.H.S a haya nan ta manda tur trahado cas y cuminsa e proceso pa kibra relacion di trabou cu nan y eventualmente cuminsa un caso legal contra e compania Mericano cu a para e contract den forma abrupto cu nan. Pero, entretanto ta scuchando di fuentenan no-oficial, cu SOGA lo a yega of ta yegando na un deal cu OHL Arellano Construction Company pa e laga e proyecto bay, pa asina por laga e contratistanan local mes caba cu e trabou pendiente.
Locual a constata awor ta cu e Hunta di Directiva di Dr. Horacio E. Oduber Hospital, consistiendo di Jacco Vroegop y Gregory Croeze a bati alarma mesora na Conseho di Minister, pues tanto na Minister Dangui Oduber mes pero tambe na Minister Presidente mr. Evelyn Wever-Croes, pa cay den e disputa aki, sino por spera consecuencianan devastado pa cuido medico na Aruba. Gobierno a bisa di lo yama un reunion mesora, pero a tuma nan no menos di dos siman pa awor mira e urgencia den e asunto.
Contratista local mes lo caba e trabou
“Nos mes por. E trabou pisa ta tras di lomba caba. Y lo sali nos hopi mas barata tambe”, asina por lo menos un persona cu conoce e materia y ta cerca di e candela a sigura na nos recientemente. El a splica cu berdad e relacion entre partidonan tabata bou di tension pa hopi tempo caba y a sinti falta di liderazgo di partido autoridad local pa bay aden y pone tur hende para straight. Door di purba keda leu di e problema y kere cu e problema lo soluciona su mes y su so, a causa e scenario fastioso cu nos tin awe.
“E cos aki ta mas serio cu tur hende ta pensa. Nos ta nengando patient of mandando pashent cas prome cu ora, pasobra hospital ta yen y nos no tin cama pa tanto hende”, asina un nurse cu mas di 25 aña di servicio trahando na Dr. Horacio E. Oduber Hospital a duna di conoce den confiansa. “Mi no sa ken ta fout aki y mi no ta interesa tampoco, djis mester zorg pa caba cu e proyecto pa caba. No por cuminsa di 2013 y awe na 2023 ainda e no ta cla. Ta cuanto aña nan mester anto pa caba cu un simpel construccion asina? Sin papia mes di cuanto extra e ta costando nos pa cada luna cu nos ta laat”, asina el a reacciona sin sconde su cara di preocupacion.
Proyecto a cuminsa na 250 miyon florin
E doño di edificio di Hospital ta Stichting Onroerend Goed Aruba (SOGA), kende a percura pa financiamento, pa maneha y mantene e edificio nobo pa 25 aña largo. SOGA ta partner cu AIB-Bank, cu ta conta cu sosten di 18 instituto financiero local y internacional pa cera e suma total di 252.7 miyon florin, cu tabata inclui gastonan di construccion, 4 aña di supervision, compra di e edificio actual, pago na arkitecto, preparacion y hopi mas. E construccion ta den man di OHL Arellano Construction Company di Miami cu tin como partner local ALBO Aruba, Bohama, AWM Caribe, Croon y C.H.S.
Pero, cu tempo a keda añadi mas trabou y consecuentemente e presupuesto a bay completamente fo’i man! Si tur cos tabata bon y a cumpli cu e contract pa entrega e proyecto na fin di aña pasa, anto pa e ora ey, e proyecto cu a cuminsa na 252 miyon na october 2012, lo a costa pueblo di Aruba un total di 375 miyon florin na 2022. Esaki ta debi cu a añadi poco sala di operacion y algun otro seccion acerca cu ta costa un total di 109 miyon florin.
Pero, manera por constata, december a pasa bay sin cu e proyecto ta cla. E prome parti di e edificio bieu mes lo mester tabata cla na april 2022 y awo na maart 2023 ainda e ta na 85%, pues lo dura algun siman mas. Ainda lo keda falta e di dos mita. Fuentenan cerca di e trabou ta sigura cu na final, dia cu porfin OHL entrega e proyecto aki na SOGA, e lo costa pueblo di Aruba alrededor di 400 miyon florin!
Tres minister a drumi den luz berde
No ta di awo, sino ta di masha aña caba Gobierno di Aruba mester a cay den e guera aki y caba cu ne na bon of na malo. A permiti pa partidonan bringa cu otro, riba custia di pueblo, pasobra na final….ta pueblo via AZV lo mester paga pa tur e guera miyonario aki. Den esaki no por keda sin menciona cu e minister cu a start e proyecto na 2012 ta dr. Richard Visser di AVP. Pa ora e proyecto a cuminsa na 2014 e no tabata den funcion mas y tabata dokter drs. Alex Schwengle di AVP cu a encabesa e proyecto. Berdad e tabata reuni semanalmente cu tur partido, pero na final ni esey a duna resultado. A sigui dos gabinete di MEP, encabesa pa Minister Dangui Oduber, cu a opta pa keda riba distancia di e proyecto y cu consecuencia cu no a agilisa e velocidad riba cual ta trahando, sino alcontrario…a bin mas disputa, mas guera y mas tardamento.
Tocante SOGA
SOGA ta funda na juli 2005 y ta maneha pa AIB-Bank. E ta e fundacion cu ta doño di e edificio di Hospital. Meta di SOGA ta pa construi y mantene edificionan pa Gobierno. E prome tres edificionan di SOGA tabata e oficina di Impuesto y Departamento di Finansa situa na Camacuri, tambe e oficina unda Aruba Tourism Authority ta situa riba L.G. Smith Boulevard y e edificio di DOW y DIP na Wayaca. SOGA no ta solamente construi, sino tambe mantene e edificionan. Pa hopi aña caba, e presidente di Stichting Onroerend Goed Aruba (SOGA) ta John Hodgson, kende ta naci na Surnam y for di aña 2009 ta na cabes di e fundacion cu ta maneha miyones di florin na construccion, renobacion y mantencion di edificionan. E ta conta cu un directiva cu personanan conoci den comunidad, manera ta Edwin Roos, naci na Hulanda y miembro desde aña 2019; Alvin Boekhoudt naci na Aruba y miembro desde aña 2019; Sherwin Vingal naci na Aruba y miembro desde aña 2019 y Maas van Drie, naci na Aruba y miembro desde aña 2019. Por mira pues cu na aña 2019 a cambia mayoria miembro, menos e presidente.
Tocante OHL Arellano
Cu su sede principal na Miami, Florida (USA), OHL Arellano ta un subsidiario di e compania OHL Group. Nan ta specialisa den construccion y renobacion di hospital y centronan educacional di medicina y cuido. Tabata na september 2008 cu a integra OHL Arellano den OHL Group, cu ta existi caba desde aña 1974 y desde e tempo ey activo den construccion di hospital y centro di cuido como un e di e actividadnan primordial di e compania, contribuyendo asina na 75% di nan entrada anual. E compania di construccion a maneha un total di riba 1.2 biyon di Dollar Mericano den trabou di construccion haci pa varios instancia renombra, manera Baptist Hospital, South Miami Hospital, Miami Children’s Hospital, Boca Raton Regional Hospital, Mercy Hospital y Mount Sinai of Miami hospitals.
Tocante Dr. Horacio E. Oduber Hospitaal
Dr. Horacio E. Oduber ta existi desde aña 1976 y su nomber ta na honor di e prome dokter Arubiano. Tin mas o menos 1100 empleado trahando diariamente pa atende mas di 33.000 pashent pa aña, cu ta pasa den mannan di e mas of menos 100 specialistanan medico, cu hunto ta eherce 9.500 operacion anualmente.
Tur aña hospital ta interna 11.000 pashent, cu ta drumi un averahe di 5.5 dia eyden. Ta interna 500 turista, 2800 patient via Spoedeisende Hulp y 700 pashent cu ta bin Aruba for di nos region pa ricibi tratamento medico avansa y specialisa. Hospital ta conta cu 217 cama y ta brinda un variedad grandi di servicio medico na nos comunidad y na turistanan.
Pa por eherce tur e intervencionnan medico aki, Hospital ta conta cu un centro di rehabilitacion, un centro di terapia fisico, un departamento di emergencia, wondenpoli, diabetes center, pain clinic, oncologia day-care unit, 5 sala di operacion, Intensive Care Unit y asina por sigui menciona.
