Diaranson mainta a tuma luga final di e tratamento di e “Caso Avestruz” den corte. A pasa 40 ora e siman aki ta repasando henter e “dossier” di e caso di nobo. Esunnan envolvi den e caso tabata tin e ultimo palabra, p’asina trece dilanti kico e caso aki a nifica pa nan.
Un di e figuranan principal den caso Avestruz, Benny Sevinger a mustra cu ta un caso cu a cuminsa for di siman pasa dialuna, y tawata casi tur dia tabatin caso den corte, pa un total di 8 dia. E casonan tabata cuminsa for di mainta y tabata bay te atardi.
![](https://24ora.com/wp-content/uploads/2024/05/20240522122645_IT5A3649-1920x1280.jpg)
E politico a bisa cu despues di awe, lo tin un “schorsing” te dia 12 di juli, durante cual lo duna veredicto. Ta sinti cu e sentencia lo ta positivo.
Huesnan envolvi a tuma nan tempo pa lesa e dossier, pa haci preguntanan pa aclaria dicon e prome hues cu a trata e caso a yega na e decision aki. Sevinger ta indica cu defensa a “haci un tremendo trabao” pa presenta huridicamente pa haya vrijspraak conforme e reglanan democratico segun sistema di corte.
Mas aleu e politico ta indica cu Ministerio Publico ta “wrong and strong” pa yega na un sentencia, di cualkier manera. Ta indica cu en todo caso pa yega na un sentencia e politico y e otronan.
Un punto cu e veterano politico a señala cu un “grupo di hende cu tin derecho di pidi tereno a haci un peticion pa esaki, y a marca nan como “’simpatisantenan di AVP.’” Pa un fiscal trece esaki dilanti, ta parce cu ta target un grupo cu a haya un tereno y desaroy’e pero no kier pa pueblo cu ta algo politico.
Dialuna, persofficier, mr. Patrick van de Biezen, a indica cu pueblo no mester pensa cu e caso aki ta riba persecucion politico. No ta cuestion cu ta asumi cu ta politiconan a entrega un denuncia contra Sevinger y cu nan a sinta cu Ministerio Publico (PG) pa pone placa riba presupuesto di Parlamento pa persigui Benny Sevinger, of cu ex- Minister Otmar Oduber, a gasta 400 mil florin sinta na mesa cu PG pa persigui Benny Sevinger. “Esey no ta asumpcion, esey ta echo!”
![](https://24ora.com/wp-content/uploads/2024/05/20240522122730_IT5A3659-1920x1280.jpg)
![](https://24ora.com/wp-content/uploads/2024/05/20240522123251_IT5A3692-1920x1280.jpg)
![](https://24ora.com/wp-content/uploads/2024/05/20240522122938_IT5A3668-1920x1280.jpg)
Cu tur esakinan, ainda e no por pensa cu tin persecucion politico?
Ademas Sevinger ta mustra cu tin metemento den Ministerio Publico, y durante e siguiente dianan lo tende mas di esaki. A haya prueba y lo publica e casonan di metemento den Ministerio Publico. Lo bay demostra e pruebanan den diferente forma.
Tur esaki ta pa demostra pueblo cu Aruba tin un Ministerio Publico cu ta traha bou presion politico. E huesnan cu ta bin for di Corsou of Hulanda, nan si ta wak e imparcialidad di husticia. Pero ta un echo cu tin persecucion politico na Aruba.
Cu e final di e parti di defensa di Caso Avestruz, “mi ta keda den man di Dios. Gabinete Eman I y II a traha pa Aruba, traha proyecto, drecha e calidad di bida di nos ciudadanonan, ta p’esey nos contrincantenan politico ta purba kibra nos.
E parlamentario na final a bisa: “Tin un Dios y cu berdad semper lo vence.”
![](https://24ora.com/wp-content/uploads/2024/05/674A3015-1920x1280.jpg)