Den cuadro di celebracion International Youth Day, dia 12 di augustus, y inicio di aña escolar, Departamento di Salud Publico su a invita Tienda di Educacion pa nan conferencia di prensa semanal. E tema cu a papia riba dje tabata: Adolescencia, un etapa hopi dificil di bida di un hoben.
Riba e fecha 12 di augustus ta pone atencion riba salud di e hoben. E tema di e aña aki ta “transformando educacion”. Relacionista Publico di Departamento di Salud Publico (DVG), Jurette Croes, a splica cu pa nan departamento, salud mental di e hoben ta hopi importante. Dentro di poco comunidad lo cera conoci cu e expansion di e departamento di SPD, unda cu lo pone atencion riba e salud di hoben y e mucha. P’esey tambe e siman aki ta bay pone atencion riba e tema aki na inicio di un aña escolar nobo.
Tienda di Educacion ta un stakeholder importante di DVG. Nan ta suministra informacion na tur mayor di tur e cambionan cu ta sosode cu e hoben, na momento di cambia di scol of cuminsa cu un klas nobo. E periodo aki no ta facil. Tin diferente reto cu e hoben ta haya su mes confronte cun’e. No solamente fisico, pero tambe e salud mental mester di su atencion.
Corina Lindssen di Tienda di Educacion a comenta cu hopi biaha mayornan ta pensa cu e yiu ta yega e fase di adolescencia, nan ta basta grandi y independiente. E por haci tur cos riba su mes. “Sinembargo, e no ta berdad. Muchanan hoben, e fase aki ta trece asina hopi confusion y cambio, cu nan mester di sosten di nan mayornan mas y mas. Berdad nan ta bira independiente, pero ainda nan no por mira consecuencianan di nan mesun comportacion of nan mesun escogencia di kico nan ta haci na cierto momento. Nos celebro ta desaroya te cu 25 aña. Esey ta nifica cu e pida di rason cu ta esun mas importante pa sa kico e comportacion ta trece como consecuencia, ta desaroya te cu 25 aña.”
El a splica cu como mayor, mester sostene bo yiu, motiva bo yiu, y no lubida cu bo yiu tin necesidad ainda na regla, na palabracionnan fiho. No mescos tempo cu nan tabata mas chikito, sino na un otro manera.
Mayornan mester sinta papia cu yiu(nan), mustra interes riba con nan ta sinti cu tur e cambionan den su bida, pues den e fase di puberdad, e fase di adolescencia cu ta trece insiguridad, intrankilidad. “Hormoonnan den curpa, cambio di curpa, e ta wak otro hende, e ta wak por ta e otro sexo, e ta sinti cu e ta namora, ta sinti cu e tin sentimentonan di sexualidad y no sa kico pa haci cu nan.” Un biaha mas, mayornan mester duna e muchanan e guia aki.
Un otro parti importante ta ora e cambia di scol. Por ta awo e ta bay scol secundario, por ta den scol basico e tabata esun di mas grandi, e ta bira awo esun mas chikito den scol secundario. “Un biaha mas un rato grandi, con e ta mustra, con e ta bisti, con e ta pensa, kico e ta bisti. Naturalmente ta bisti uniform di scol, pero nan kier sa cua ta mas importante. Nan ta competi cu otro, nan ta sinti peer pressure y nan ta bay experimenta. Por ta un amiga ta bisa pa purba algo, por ehempel dal un drinks, of purba un joint di marihuana. Tur e cosnan aki ta na caminda, na momento cu bo bira un adolescente. Nan kier sa con cierto cosnan ta sinti.”
Si un mayor no papia cu su yiu, “si bo no tin bon conexion cu bo yiu, pa e por confiabo, por ta e ta pasa den cierto erornan, den cierto peliger, cu abo no sa. Di otro banda, no por pone nan den un casita di glas, proteha nan for di tur cos. Pa bira un adulto, bo mester pasa den e fase di adolescencia. Bo mester pasa den tur e cosnan cu bin na caminda y bo mester haya chens pa haci fout. Door di fout bo ta siña y bo ta desaroya,” sra. Corina Lindssen a splica.
