Den un ceremonia na RBC Bank Sasaki y den presencia di Minister di Cultura Xiomara Ruiz Maduro a batisa jingle nobo di carnaval. Naturalmente tabata presente tur e personalidadnan di e ultimo carnaval.
Jason Brown, Presidente di Stichting Musica Aruba Carnival (SMAC), a splica cu e ambiente tabata tremendo pa inicio di e temporada nobo di carnaval.
Un biaha mas RBC Sasaki tabata sede di e ceremonia di lansamento di e jingle nobo di carnaval. RBC, segun e director Pierre Rafini, semper ta sinti nan mes orguyoso di por contribui cu carnavalistanan. “Pa nos ta un dia di fiesta na RBC, inicio di e fiesta mas grandi di Aruba.”
E jingle tin un kick nobo, treciendo e toke extra di loke ta e berdadero ritmo di Asambeho cu ta wordo presenta pa Galloway, kende recientemente a representa Aruba na un festival internacional.
Mirando cu e biaha aki ta celebrando carnaval 66 a trata di hinca mas tanto e aspecto di morocho den e jingle. No solamente ta celebra carnaval 66, pero celebracion di aña 2020 y e lansamento a tuma luga riba 11-11, Ruben Garcia a splica. Mirando cu digitalisacion ta na ordo di dia, p’esey a entrega un link na Pierre Rafini y di e forma aki a lans’e pa pueblo di Aruba por scuch’e.
Garcia tambe ta di acuerdo cu e jingle nobo ta algo completamente diferente cu ta laga e hendenan sinti e gana di “jump” ora cu nan scuch’e.
Dialuna anochi e ambiente a sigui na Carnival Village na San Nicolas unda tin e Legends Festival cu ta conta cu animacion di bandanan grandi Buleria, Le Groove y Tsunami, compaña pa dos brassband. Entrada ta gratis y pueblo ta invita pa celebra di e forma aki apertura di Aruba su temporada di carnaval.
