Shonnan, diasabra ultimo, 16 di maart, un berdadero sambombaso di wega di domino tabatin na e palacio di plak piedra, e unico Domino Square Garden, aya n’e grens entre Calabas y Kudawecha. E dinamico “team to beat”, esta Team Snor, bou liderazgo dje flamante “Snor” Perez hunto cu su “general tactico”, Captain Magda, a pronostica cu Sero Blanco Domino Team lo bira nan siguiente victima. Pero shonnan, locual si nan no a pronostica ta cu esaki lo bira un “zware bevalling!”
Team Sero Blanco a bay c’un berdadero ekipo ‘mercenario’ cu intencion serio di corta Snor su mustashi y pone come esaki sin sao y sin peper! Ora bo wak cara di Nai Rasmijn ta milita den ekipo di domino, hala faha mara pasobra cos ta bay bira ‘spannend’! E prome tanda a bay estilo un pa mi, un pa bo.
Un rato Snor ta ‘on top’, un otro rato e ta ‘den bottom’, y asina ey e wega ta preta-preta y dado momento Sero Blanco ta ariba cu 10-9! Team Snor ta grita “alle hens aan dek”, y cu hopi lucha toch ta logra drenta halftime cu bentaha minimo di 11-10!
Despues di a gosa di e snacknan gratis, e bataya ta continua y Captain Magda tabata man na cabes pasobra dos hungado di Team Snor mester a bay. Sero Blanco a probecha di biaha y a bay ariba cu score di 14-12! Ata! Otro hungado di Team Snor a bula afo. Captain Magda a drenta cushina y saca chef na horea pa bin yuda! Team Snor a recupera 16-15. E bataya tabata manera horcan cu a coy forsa ora a empata na 18-18, y un y tur presente por a sinti e atmosfera di presion y ansha! Sero Blanco tabata manera tribon cu a hole sanger y a bay den un “feeding frenzy”!
Score a bay 19-18 pa Sero Blanco. Angustia total ora Sero Blanco a yega ‘top of the hill’ cu score di 20-18! Captain Magda un tin mas huña pa come y a haci cambio desespera. Ata … Snor a corta bentaha na 19-20; un wanta di rosea mas, y Snor ta empata sensacionalmente na 20-20! Y ata, un biaha mas, tanten nochi no cera bina su careda un ta caba!
Cu forsa di alivio total Snor ta grita “Binti-uuuun!”, y dje forma aki ta caba ansha y susto di tur hungado y fanatico. Ambos ekipo ta brasa otro den un ambiente mutuo y di respet pa c’un berdadero bataya epico den e unico y mundialmente famoso Domino Square Garden!
