Vincent Storimans ta e representante nobo di Hulanda aki na Aruba, director di VNO Aruba, kende nos por corda a keda introduci n’e isla algun luna pasa oficialmente compartiendo su trayectorio di su carera manera tambe su metanan na Aruba.
E tambe tabata presente na e Aruba Investment Summit na Hulanda y ta comparti cu nos cu nan ta hopi contento di por sostene Aruba den esaki.
“Nos ta sostene e iniciativa aki di minister Wever.” Storimans ta bisa cu awor tin un situacion unda cu turismo ta domina na Aruba y ta importante pa diversifica otro sectornan. Tabata tin empresarionan Hulandes presente na e Aruba Investment Summit den diferente sector cu por yuda den e diversificacion di Aruba su economia. “Nos a scucha di varios posibilidad, nos a keda inspira y por a haci algun pregunta, y esey ta e resultado di loke e conferencia aki kier a trece, y di esey mi ta hopi contento di dje.”
Storimans ta bisa cu tin hopi posibilidad, hopi chens cu tin inversionnan nobo pa Aruba y por a mira esaki tabata bisto durante e conferencia aki. Bo por pensa tambe riba e sistema fiscal cual pa empresarionan Hulandes e ta hopi interesante cu Hoge Raad ta e instancia mas grandi, un sistema hopi confiabel cu ta existi na Aruba.
Ta pensa tambe riba e mercado Latino Americano, mercado Colombiano of di Panama, e siguridad di Aruba cu bo por biba un bida safe y hiba bo yiunan scol, ta cosnan hopi importante. “E mercado di 120 mil hende tambe naturalmente y dos miyon di bishitante pa aña den turismo, e turismo crucero, tur esaki ta interesante pa inverti den Aruba.”
Storimans ta bisa cu e ta hopi satisfecho con e cumbre inicia pa minister Wever na Hulanda, a bay. E ta spera cu por keda mira bek na esaki como ehempel positivo den e relacionnan entre Aruba y Hulanda y ta spera di por tin cosnan hopi bunita biniendo for di esaki den futuro.
