Diasabra ultimo tabata tin e prome gran bataya den torneo NOS cu NOS n’e unico Domino Square Garden na mundo, esta 99 Bar & Restaurant situa na Calabas/Kudawecha. Den un increible demostracion di “dominokunde”, e team cu pa añas caba ta duna Team Snor dolor di cabes, esta Team Biba Lekker, un biaha mas ta suta Team Snor na un forma cu aki e diosnan di domino mes a bisa ta basta!

Prome cu half time ainda, manera nan ta bisa na Hulanda, tabata tin “geen vuiltje aan de lucht”. Team Snor y Team Biba Lekker tabata bataya otro mano a mano y e encuentro ta drenta half time cu score di 11 – 8 na fabor di Team Biba Lekker. Un score “mwah” cu por bay ambos banda ainda, aunke cu capitan di Team Snor ainda no por tabata presente pa motibonan di compromisonan “laboral”.

Despues di un pauze basta largo, ya cu 99 Bar & Restaurant ta conosi pa ofrese su guestnan un batayon di snack sumamente sabroso den half time, e bataya a continua caminda cu Team Snor tabata tin su “general” back na mando! Team Snor, conosi pa nan uniform hopi original caminda cada hungado tin un polo custom made cu su caricatura ariba, a sali loke cu tin cu intencion brabo brabo! Segun “Snor” Perez, a yega e ora pa pone un sugar tax pa Team Biba Lekker! Sinembargo, lo bai resulta cu ta Team Biba Lekker ta mandando sucu di Team Snor sky high!! Mientras cu pafo tabata tin demostracion di “Breakdance” y na bar algun fanatico tabata practica nan habilidad den “kansrekening”, Team Snor tabata cay den velocidad morocoy y den un frega di wowo e score tabata 20 – 10 na fabor di Team Biba Lekker! Asombro y mal beis tabata bisto ariba cara di integrantenan di Team Snor, y di nervio y susto capitan ta morde su snor pisa! Un rato despues e grito di alivio ta cay… “Biiiiba Leeekker!”

Pues asina, den forma aplastante, Team Biba Lekker un biaha mas ta demostra cu nan ta e pesadiya di Team Snor, kendenan te dia di awe nunca por a gana Team Biba Lekker! E veredicto pa Team Snor ta, manera nan ta bisa na Merca: “needs work”!

Comments

comments