Tatiana Winklaar a comparti cu orguyo riba su red social cu el a completa su estudio y a obtene su diploma Bachelor in Education, despues di 16 aña di dedicacion y perseverancia na Hulanda.
El a termina su formacion como docente di segundo grado den e area di Gezondheidszorg en Welzijn (Salud y Bienestar). Actualmente, e ta traha na MBO Rijnland, na Leiden, unda e ta duna les den e formacion di asistente di dentista.
Den su publicacion, Winklaar a recorda cu 16 aña pasa el a sali di Aruba pa Hulanda cu e meta di inverti den su futuro door di sigui studia. El a laga su famia, amigo- y conocinan atras, sin sa con su bida lo desaroya den e pais nobo.
Durante e trayecto aki, el a acumula experiencia, y a forma amistadnan balioso y supera diferente reto cu a contribui na su desaroyo personal y profesional.
Pa Winklaar, e ceremonia oficial di graduacion ta representa mas cu solamente un diploma. E ta un momento special pa mira bek riba tur e esfuerso, sacrificio y perseverancia cu a hib’e te n’e logro aki.
El a comparti tambe cu nunca e no a imagina cu, despues di 16 aña, e lo ta bibando ainda na Hulanda y trahando cu tanto amor y alegria den su profesion.
Awor, e ta mira bek riba su trayecto cu orguyo y gratitud, mientras cu e ta mira padilanti cu confiansa p’e oportunidadnan cu futuro por trece.
Su mensahe ta un refleho, con perseverancia y dedicacion por hiba un hende mas leu cu e mes a yega di soña.
