Un accidente fatal awe, diasabra 10 di october, pa mas o menos 5:00 di marduga na altura di Winter Garden na Savaneta, a costa un homber di 70 aña su bida. Un auto marca Nissan, modelo March, a alcansa e peaton, lagand’e gravemente herida.
Despues di e impacto, e chauffeur a opta pa
bandona e sitio, lagando e victima atras. Ora paramediconan a atende e homber, ainda nan a sinti un pulso debil. Nan a transport’e cu ambulance pa hospital, pero na su yegada e homber a fayece.
Mas despues, e chauffeur a presenta na warda di polis pa entrega su mes. Polis a interog’e mesora como sospechoso. Segun informacion ricibi, e chauffeur no tabata burachi.
Cu e caso aki, Aruba ta conta 13 morto den trafico den aña 2026. E cifra ya ta iguala e total di henter aña 2024, ora cu 13 persona a perde nan bida den trafico. Na aña 2025, Aruba a registra 11 morto den trafico.
E accidente fatal di awe ta trece e total di e aña aki riba esun di aña pasa, mientras ainda falta casi tres luna pa cera 2026.
Identidad di e victims ta conoci pero polis ta pendiente pa famia reconoc’e prome.
