Parlamentario di AVP, Dennerich Kelly, ta pidi gobierno di Aruba pa presenta cifranana ctualisa tocante cantidad y concentracion di Short-Term Vacation Rentals (STVR) y pa evalua e posibel impacto di e sector aki riba disponibilidad di vivienda pa huur di largo plaso.
Segun Kelly, Aruba tin mester di un panorama cla pa por planifica cu e desaroyo turistico y e necesidad di vivienda di su residentenan den mente.
Un estudio haci door di Land Aruba na 2023 a compara un estimacion di 4,203 vacation rentals cu un total di 38,830 vivienda. E estudio a identifica un concentracion significativo di vacation rentals, particularmente den Noord.
Segun e datonan di AirDNA uza den e estudio, Noord tabatin aproximadamente 2,083 vacation rentals. E cantidad di vivienda completo ofreci via Airbnb y Vrbo tabata ekivalente na aproximadamente 25% di e total di vivienda registra den e area na 2020. E investigadonan a indica cu e cifranan di AirDNA mester wordo considera un calculo conservador, pasobra nan no tabata inclui tur vacation rental existente na Aruba.
Pa Kelly, e datonan aki ta un punto di salida importante, pero nan mester actualisa esaki pa por compronde e realidad di 2026. “Nos tin informacion di varios aña pasa. Pero e mercado no a keda para. Nos mester sa cuanto STVR nos tin awendia, unda nan ta concentra y, principalmente, cua ta e impacto cu e desaroyo aki tin riba e cantidad di vivienda disponibel pa long-term rental,” Kelly a expresa.
E parlamentario ta reconoce cu vacation rentals ta representa un actividad economico importante pa Aruba. Segun cifranan publica pa Aruba Tourism Authority pa augustus 2026, e sector a registra un ocupacion promedio di 57%, un tarifa promedio diario di US$359 y aproximadamente US$36.8 miyon den entrada durante e luna ey.
Kelly ta señala cu precisamente e importancia economico di e sector ta haci data confiabel y planificacion necesario. Un evaluacion actualisa mester permiti gobierno y parlamento compronde con e mercado ta desaroya y cua ta e implicacionnan pa residentenan cu ta busca un vivienda pa huur di largo plaso.
“Nos no tin cu demonisa un sector cu ta genera actividad economico. Pero importancia economico tampoco mag elimina e necesidad pa planificacion. Turismo mester por crece, pero nos localnan mester por sigui biba na Aruba tambe,” Kelly a enfatisa.
Dennerich Kelly ta pidi Gobierno pa aclarea cuanto STVR tin actualmente na Aruba, unda nan ta concentra y cuanto di nan ta vivienda completo. Alabes, e ta pidi informacion tocante con e disponibilidad di vivienda pa huur di largo plaso a cambia durante e ultimo añanan.
