Un famia a hayanan den confrontacion awe mainta na momento cu personal di wardacosta a pidi polis pa bin atende cu nan na e rancho band’i Mariniers Kazerne na Savaneta.
Locual cu por a compronde cu e famia di piscado aki di Santa Cruz, tin algun biaha caba den situacion preocupante cu wardacosta riba lama. Tabata algun tempo pasa cu nan a perde tur nan pisca na momento cu a confisca esaki for di nan.
Awe mainta a surgi otro confrontacion, den careda di 10:00 am, na momento cu wardacosta a indica cu a manda boto riba nan. A bin cu e boto aden. Mientras esey tabata tumando luga, e yiunan para na e rancho band’i pabou di kazerna tabata mira con tabata baha cu nan tata na boei.
Tin di menciona cu abordo tabatin un persona cu papel di asilo caduca y pa esaki wardacosta a atende cu ne.
Esaki a causa un consternacion. Na e momento ey, wardacosta a tuma contacto cu polis pa bin atende cu e yiu (nan) aki den cercanida di kazerne, cu segun informacion lo a lanta cu nan.
Di otro banda, e yiunan a informa cu ningun momento esaki a tuma luga. Nan ta disgusta berdad cu e trato cu nan ta hayando di parti wardacosta pero cu niun momento a lanta cu nan. Polis a presenta na sitio y atende cu nan, mientras cu e detene e tata y transport’e pa warda di San Nicolas. A compronde cu e no obedece ordo di wardacosta, como tambe no tabata tin su papelnan na ordo.
