Polis a detene e homber Alexander Moreno ayera patras di Renaissance Mall debi na un pelea den pleno publico. Ey el a ataca e conocido futbolista Valdo Leocadio, cu ta hunga pa SV La Fama. Ayera mes el a sali di prizon bek y a avisa polis cu si e homber mishi cu su yiu atrobe, cu e lo bolbe dal’e. E tata ta insisti cu e futbolista ta un pedofiel!
Awe mainta Alexander Moreno a pidi nos pa topa cu ne dilanti ward’i polis na Oranjestad, pa e splica su banda di medaya dicon el a dal Valdo Leocadio ayera den Renaissance Mall. E ta sinti cu tur tata lo haci mesun cos y e sigur no ta arepenti di locual el a haci y ta avisa di awo caba, si Valdo faya cu su yiu homber un biaha mas, e lo bolbe atende cu ne personalmente. E declaracion aki el a haci na recherchenan tambe, cu a conseh’e pa entrega un keho separa na Jeugd en Zeden Politie pa “ontuchtige handeling” contra e futbolista.
Moreno a splica den un entrevista exclusivo cu 24ora.com cu e futbolista ta compaña awendia cu mama di su yiu. Nan tin como 5 luna saliendo cu otro. E mes cu e mama a laga otro di mas of menos un aña pasa. E nunca den pasado tabatin problema cu Valdo Leocadio y ta cumind’e unda cu nan topa pasobra con cu bay bin, e ta supose di tira bista pa su yiu tambe. Pero, awor cu esaki si e rolnan a cambia.
E siman cu a pasa aki e yiu homber a conta su tata cu ora Valdo Leocadio a bin su cas cerca su mama, dado momento a bay hunga Playstation cu ne. Pero durante e hungamento di e wega via television, e pareha nobo di su mama a pasa man na su pia, cerca di su parti delicado. E mucha a sinti masha malo mes y cu miedo el a conta su tata di e situacion. E tata no a perde pa gana y mesora a activa ora cu el a topa e homber canando riba caya manera nad’un pasa.
El a atende cu ne riba su comportacion y su intencionnan pa cu su yiu homber chikito. Na un forma duro e tata a planta respet y sali na honor di su famia y su yiu. El a splica e pareha nobo di su ex, cu e no tin ningun problema cu e ta sali cu e mama di su yiu pasobra cada ken a forma nan bida caba cu un otro persona. Pero si e faya cu su yiu homber, e ta dispuesto pa perde tur cos! E mensahe cla ey el a duna e homber, cu parce, segun e yiu, tin idea pedofiel den su cabes.
Alexnder Moreno a splica na final cu e tin 13 aña bibando y trahando na Aruba sin ningun problema sin nunca a haya su mes den problema cu polis. Parce cu door di e problema cu el a haya su mes aden aki, defendiendo su yiu chikito, cu Renaissance Mall a prohibie di drenta e mall, consecuentemente e no por traha mas. E ta traha hopi aña den un tienda eyden. For di su trabou tambe nan a mand’e un carta cu lo tuma medida disciplinario contra dje, pa cual e ta sigur cu e por defende su mes y splica su doño di trabou kico a pasa.
Na final, Moreno a pidi mayornan pa ta extra mas atento den e temponan aki. Corda cu tin vakantie y muchanan ta na cas. E pedofielnan ta riba un racha pasobra muchanan ta mas na cas awendia door cu no tin deporte ni mucho actividad riba caya debi ne pandemia. Y den mayoria caso, ta hende cerca ta malogra bo yiu, pa cual mester papia cu e muchanan y kere nan ora conta bo tambe. Den su caso, e ta kere su yiu y e no ta bay warda riba polis pa investiga, e mes a bay splica e homber aki cuantor’ tin y pa e sa, cu si e tende un biaha mas cu el a mishi na luganan straño na curpa di su yiu homber, cu e lo regresa!
