Mientras cu na nort di Italia a pone prohibicion pa 16 miyon persona y Prome Minister di Hulanda Mark Rutte a pidi pa evita di saluda cu man, companianan farmaceutico rond mundo ta den un careda pa busca remedi y/of vacuna pa coronavirus.
Industria farmaceutico ta trahando caba riba 30 remedi y cuatro vacuna contra coronavirus. Entre e remedinan aki tin antiviral cu a test nan anteriormente riba entre otro Ebola y HIV.
E industria aki ta sigura cu nan tin 30 remedi cu nan ta bezig ta test pa mira su eficiencia contra Covid-19 y cu tin cuatro compania farmaceutico cu ta investigando e eficiencia di un posibel vacuna.
Desde aparicion di coronavirus, cantidad di compania na mundo a mobilisa nan ekipo di investigacion pa buskeda di un posibel tratamento pa wanta e epidemia. Entre e posibel remedinan tin antiviralnan getest anteriormente den malesanan manera Ebola y HIV.
Segun informacion compila pa e tres companianan farmaceutico mas grandi di mundo (Ifpma, Efpia y Phrma) ta existi posibel tratamento manera un combinacion di e remedinan antiviral lopinavir y ritonavir, di e compania Mericano AbbVie; e antiviral remdesivir, di Gilead; inhibitor zanamivir, di e Britanico GlaxoSmithLline, of interferon, investiga pa e farmaceuticonan Roche, Merck y Bayer.
E empresa Hapones Takeda tambe ta desaroyando un remedi di plasma di sanger, globulina hiperinmune policlonal, pa trata personanan di hopi riesgo cu coronavirus. Otro companianan manera Pfizer, a anuncia un evaluacion preliminar di cierto componentenan antivural cu ta den desaroyo y cu a wanta e creacion di coronavirus similar cu ta causa Covid-19 den e celulanan cultiva.
Regeneron Pharmaceuticals tambe ta traha den colaboracion cu Departamento di Salud y Servicionan Humano di Merca, den creacion di un tratamento nobo pa combati e virus.
Di otro banda, segun Farmaindustria, otro grupo di laboratorio ta enfoca den creacion di un posibel vacuna contra coronavirus. Por ehempel, companianan manera Johnson & Johnson o Sanofi Pasteur pa algun siman caba ta trahando pa acelera e creacion di un vacuna. Asina tambe, GSk ta trahando riba tres linea di investigacion den asociacion cu e consorcio Coalition for Epidemic Preparedness Innovations, cu e compania Chines di biotecnología Clover Biopharmaceuticals y cu Universidad di Queensland, na Australia.
E Comision Europeo (CE) ta lansando un proyecto di colaboracion cu e industra farmaceutico atrabes di e iniciativa Europeo di Remedi Innovado (IMI), financia un 50% entre CE y e asociacion Europeo Efpia. E meta di e programa ta pusha pa investigacion di un posibel tratamento entre gruponan chikito y centronan di investigacion principalmente di universidadnan y pymes. E iniciativa aki a haya un fondo di 45 miyon euro.
Na Merca e principal responsabelnan di e companianan GSK, Gilead, Regeneron Pharmaceuticals y Moderna, hunto cu ehecutivonan di investigacion y desaroyo di Pfizer, Johnson & Johnson y Sanofi a reuni siman pasa na Cas Blanco cu Presidente Donald Trump.
Origen
Mientrastanto, e investigacion riba origen di coronavirus di 2019 ta sigui su caminda.
Revista medico The Lancet a bisa cu e coronavirus aki a cuminsa den bida silvestre (animalnan no di cas) mescos cu otro virusnan similar. Expertonan ta bisa cu e brote ta rondona pa demasiado rumor y mal informacion.
E experto Chines Zhong Nanshan a bisa cu e epidemia a aparece pa prome bes na China, pero no necesariamente su origen ta na e pais Asiatico aki.
Organisacion Mundial di Salud (OMS) a bisa bon cla na varios ocasion cu uza COVID-19 como nomber di e malesa causa pa e coronavirus nobo tin como meta evita e uzo di otro nombernan cu por stigmatizante, manera esnan basa riba e ubicacion geografico.
Plamamento di e virus ta un tema mundial y e trabou pa yega na e fuente di e coronavirus te ainda ta andando, segun OMS.
