“E desaroyado ta reserva tur derecho y recurso contra bo pa loke ta cualkier publicacion cu ta potencialmente perhudicial p’e proyecto y/of e desaroyado.”
E intimidacion aki ta loke cu Heberto Gamero Contín, un cumprado di varios apartamento di Acqua Condominium, a ricibi diabierna ultimo como contesta riba un carta, unda cu e ta pidi mehora e condicionnan di Radisson Blu Hotel.
Gamero ta cuestiona: “E desaroyado no a viola nos derecho den dispone di un edificio cu tambe ta pertenece na otro persona? Ta legal condiciona e firma di un scritura n’e aceptacion previo di un addendum unda cu ta transferi e parcelanan n’e desaroyado sin pago algun? Tur esaki no tabata “perhudicial” pa nos despues di 14 aña di espera? Nos mester keda keto y pa nan sigui abusa di nos?”
Gamero ta agrega: “Dado cu tabata imposibel logra cu e condicionnan dje hotel mehora, despues di un cantidad di e-mail, no ta keda nos nada otro cu recuri n’e medionan di comunicacion y na parlamento di Aruba cu e fin pa pidi e anulacion di dicho addendum, di demanda e cumplimento di e acuerdo firma diescuater aña pasa. Ya basta di maltrato. Cu loke Dios kier y mientras tanto, nos ta sigui busca pa haya husticia.”
