Manera a publica anteriormente pa tene na cuenta cu e uzo di awa di dam ta pa motibo cu Departamento di Agricultura, Cria y Pesca a premira cu e damnan rond Aruba for di basta tempo no tabata bon yena cu awa. For di algun aña caba cu Aruba no a haya un yobida torencial pa yena e damanan rond Aruba completamente.
Ta simplemente algun yobida no suficiente y sporadicamente. Automaticamente ta haci cu e poco awa cu e damanan tabatin no lo tabata suficiente pa por tin un duracion largo na momento di secura. Esaki ta haci cu na e momentonan aki hopi di e damnan aki ya ta bashi y no tin awa pa por abastece e agricultornan cu ta haci uzo di e awa di damnan aki.
Momento a yega pa Departamento di Agricultura, Cria y Pesca Santa Rosa tuma e decision pa cuminsa cera e damnan cu no por wordo uza mas debi cu esakinan ya ta bashi y no tin awa. Ta simplemente e lodo den fondo a keda cual por haci esaki ta peligroso pa esunnan cu yega cerca tanto persona of e bestianan cu kier bebe awa. Lo tuma algun tempo pa e lodo aki seca si dado caso awa no yobe pa Santa Rosa por cuminsa haci e damnan aki limpi. Cu e lodo cu tin nada no por wordo haci.
Departamento di Agricultura, Cria y Pesca ta haci un apelacion pa tene cuenta cu mayoria dam lo wordo cera pa no crea peliger. Mientras tanto e pos di awa dushi na Savaneta y Pavia ta keda den funcion, mientras cu tin awa. E dam di Tanki Leendert y e dam di Rooi Afo lo wordo cera di tal manera cu ta pick-up so por pasa pa coy awa pa e cunukero cu tin mester. Departamento di Agricultura, Cria y Pesca Santa Rosa ta haci un apelacion pa tene na cuenta e cambionan aki cu ta na bienestar di nos Sector Primario.
Sea creativo riba reserva di awa
Dado caso cu bo por tin espacio pa ta mas creativo riba reservanan di awa pa e temporada aki cu no tin suficiente awa di dam ta conseha bo pa tira un bista riba esaki. Check bo airconan na cas di e awa cu e ta produci si bo por colecta esaki. Bo wasmashin tambe hopi biaha e awa aki ta bay perdi. Check esaki tambe si bo por colecta e awa aki. E habon cu ta den e awa of e habonnan cu ta wordo uza awendia mayoria biaha nan ta “Biodegradable”. Esaki ta nifica cu e habon na momento cu bo tire den e awa pa laba e pañanan ta na e momento ey so e tin efectividad. Na momento cu e awa aki bay afo, of den tira esaki no ta causa ningun daño mas. Kiermen bo por uz’e riba bo matanan. Departamento di Agricultura, Cria y Pesca ta desconseha si y cual ta prohibi tambe pa uza awa di pos riba e matanan. Esaki no por wordo haci.
Sea mas creativo y wak si berdad bo por ta mas consciente den uzo di awa y colecta for di unda cu por colecta. “Awa ta Bida.”
