Pa minimalisa e riesgo di contacto, Dr. Horacio E. Oduber Hospital a pone un “Pre triage tent” banda di Departamento di Emergencia. Esaki ta encera cu si Bo mester di ayudo di dokter di warda of mester bay Departamento di Emergencia, tur pashent tin cu pasa via e tent aki.
Esey kiermen si bo mester di ayudo di Huis Artsen Post ((HAP), lo Bo mester cana bay na Departamento di Emergencia. Banda di e Departamento di Emergencia tin un tent cu Dokternan specialisa wardando Bo. Nan lo haci preguntanan cardinal p’asina mira si bo tabata afo, si bo tabata den contact cu pashent cu tin Coronavirus, etc.
Charlaine Huntington, encarga cu e departamento di Comunicacion na Hospital, a duna di conoce cu a base di e preguntanan aki nan lo manda bo Dokter na warda, Departamento di Emergencia mes of bay cas mirando cu bo tin e sintomanan di Coronavirus y yama e tiplijn unda nan lo sigui yuda Bo.
Hospital ta suplica tur hende pa tin extra comprension. Ban minimalisa e riesgo di contagio. Si bo mester di ayudo di Dokter na warda of Departamento di Emergencia, pasa na e “Pre triage tent”. Tin e dunadonan di cuido cla pa atende bo, lo haci preguntanan masha cortico mes y por sigui pa haya e cuido necesario.
Si bo mester bishita Dokter na warda e orario ta di dialuna pa diabierna 6:30PM pa 10:30PM, durante fin di siman y dianan di fiesta e orarionan ta di 9:00AM pa 1:00pm y 6:00PM pa 10:00PM. Si bo tin sintomanan di Coronavirus, esta keintura halto di 38 grado, tosamento seco y problema pa hala rosea, yama e tiplijn di 2800101. Ta pidi pa no bin Hospital si tin e sintomanan aki, sino minimalisa e riesgo di contagio. Si bo ta hopi malo, claramento nos t’ey na Departamento di Emergencia pa atende Bo!
