For di comunidad nos a haya un potret cu ta circulando riba rednan social, di trahadonan di Directie Volksgezondheid Aruba (DVG) comiendo hunto na un mesa cu 9 hende, mirando un wega di futbol den VIP Room di aeropuerto. Esaki riba un dialuna, despues cu den fin di siman e mesun DVG a laga cera varios negoshi pasobra nan no ta atene nan mes na reglanan di distanciamento social. Pa awe DVG mes duna e mal ehempel na comunidad, estilo scucha mi instruccionnan pero no mira mi hechonan.
Un empleada di DVG a splica nos cu desde cu DVG hunto cu Hospital ta brinda e servicio di control di Covid-19 na aeropuerto, cu e VIP Room a bira nan “kantine”. Eyden nan ta sinta come durante break y cu nan ta traha oranan largo, haciendo test riba decenas di pasahero cu ta yega Aruba diariamente riba e vuelonan.
Pero e hecho cu a scoge un di e espacionan mas bunita di aeropuerto pa ta nan cantina no ta e problema, sino e mal ehempel cu ta duna dor di sinta cu 9 persona na un mesa. E pregunta awor ta: DVG lo haya multa? Na Hulanda por ehempel, e minister di husticia a saca un potret den grupo dia cu el a casa, a public’e riba Facebook y el a haya un multa mesora. Den e caso aki, DVG ta yega negoshinan cu un actitud di superioridad y autoridad, menasa comerciantenan cu multa of cu lo cera nan negoshi y nan mes ta sinta cu 9 hende riba otro, saca potret y public’e tambe riba Facebook, mustrando nan poder, arogancia y un sentido cu “nos ta manda toch y ningun hende por haci nos nada”.
For di comunidad ta saliendo hopi keho ultimamente pasobra gobierno tur dia ta bin cu mas regla, den un esfuerso pa purba combati contagio di Covid-19. Den esey ta stroba e balans cu mester tin den aspectonan di salud publico y economia. Comercio ta pasando den un crisis sin prescedente y cu e reglanan adicional ta hacie mas dificil so pa por purba sobrebibi. Pero cu autoridadnan mes ta burla di e sistema y duna mal ehempel na comunidad, pa despues nan menasa cu multa y cera negoshi si ta un asunto condenabel!
