Ajax di Amsterdam por keda sin varios hungado clave despues cu 11 miembro di e ekipo a sali positivo pa COVID-19 prome cu e partido di Champions League diamars contra Midtjylland, e cadena RTL a informa.
Ajax a biaha pa Dinamarca dialuna cu solamente 17 futbolista, di acuerdo na e website di e ekipo. E club no a duna di conoce e nomber di e hungadonan infecta debi na e reglanan di privacidad.
E capitan Dusan Tadic, portero Andre Onana y e centrocampistanan Davy Klaassen y Ryan Gravenberch lo a bay pa ta titular den e partido di Grupo D na Herning, pero a keda afo.
E portero suplente Maarten Stekelenburg tambe a keda afo, lagando solamente un keeper, Kjell Scherpen den e constelacion.
Medionan Hulandes a bisa dialuna cu nan ta realisando otro prueba riba e afectadonan cu e speransa cu e resultadonan por resulta negativo y cu mas hungado por biaha pa Dinamarca, pero tin mester di permiso di UEFA pa haci esaki.
Segun e reglanan di e organismo rector di futbol Europeo, Ajax mester hunga e partido si e tin 13 of mas hungado di su lista A disponibel.
Ajax ta e di tres den e Grupo D di Champions League cu un punto den dos partido, cinco unidad tras di e lider Liverpool y tres leu di Atalanta. Midtjylland ta e ultimo tras di a perde su dos prome encuentronan.
