Dialuna 3 di april 1973, na New York, e ingeniero di Motorola, Martin Cooper, a realisa e prome yamada for di un telefon celular, pero segun su propio palabra, mas dificil cu invent’e tabata pa dicidi ken pa yama como e prome comunicacion historico aki. Te fin di siglo 19 tabata uza comunicacion wifi mayotia biaha p’e industria maritimo, pero na comienso di siglo 20 a dal e prome paso pa uzo terestre, manera polis, bombero, banco y stock exchange market tabata e prome pa uni nan mes.
Na aña 1946, Merca a bira asina e prome pais pa uza e servicio aki pa usuario particular. E compania AT&T tabata bende Mobile Telephone System di 6 canal y na 1968 a introduci Improved Mobile Telephone Service di 44 canal. Pero nan no tabata mas cu transmisornan di frecuencia fiho. Aki cada telefon tabata un stacion di radio pa un area determina.
Na aña 1947 Douglas Ring, un ingeniero di Bell Laboratories, a presenta e teoria di telefon ‘celular’ n’e hunta di director di AT&T. E sistema complica tabata den reparti e teritorio den cel, cada un cu un antena pa tira bentaha di e espectro manera mas eficiente y uza mesun frecuencia na varios zona na mes momento.
Complica tabata cu e telefonnan mester funciona cu frecuencia hopi halto, ora un usuario ta pasa di un cel pa otro, e sistema mester detecta e cambio y combina e frecuencianan den tempo real pa evita cu comunicacion ta kibra. Pa maneha tanto informacion, usuario, ubicacion di e cellular di origen, cel di destino y detecta e cambio di ubicacion di algo di nan, tabata necesario pa maneha un volumen di informacion y un base di dato cu no por a maneha pa e epoca, esaki a retrasa posibilidadnan real di implementacion pa mas cu 20 aña. Te na fin di e decada di ’60 e companianan grandi telecomunicacion tabata na caminda pa bira e promenan pa logra Implementa e sistema, ora cu a aparece cu Laboratorio Bell di AT&T bou di Joel Engel lo tabata e ganadonan, a sosode algo inespera.
Martin Cooper, un ingeniero experencia y extrovert di Motorola a delanta su concurentenan inventando e DynaTAC 8000X, un telefon voluminoso y extremadamente pisa, cu, no obstante su tamaño, tabata funciona. E compania a planea un presentacion na Hotel Hilton di New York, pero Cooper tabata kier a yega cu e prome yamada formal haci y no ilustra un test fracasa. Motorola a acepta su plan, pero mirando cu tabata trata di un comunicacion historico, ken pa yama? E presidente? Na un canal di television? Ora cu Cooper a bisa nan ken tabata kier a yama, ningun a aproba su ideanan, sinembargo, e lo a sali cu su kier.
Dialuna dia 3 di april 1973, Martín Cooper a sali riba caya pa cana te na Hotel Hilton. El a cana algun caya leu, den sixth avenue, a kita su aparato voluminoso y a marca e number di Bell Laboratories di AT&T, su competencia tecnologico, ora cu nan a contesta e yamada, el a pidi pa nan conect’e cu Joel Engel, esaki a hisa su telefon y a keda asombra ora cu Cooper a bisa “Mi ta yama for di e prome telefon celular di historia, den 10 minuut cende bo television, lo bo mira e presentacion na Hilton”.
