Direktiva di Swim Club Orca Curaçao por mira bèk, riba un fin di siman super eksitoso na Boneiru, pa e disiplina di waterpolo señor dama i pa e disiplina di waterpolo señor kabayero.
Tur dos ekipo a titulá kampion durante di un torneo, organisá pa e klup di landamentu i waterpolo Baracuda’s. Apesar ku e ekipo di waterpolo di Aruba na último momentu a kai afó, esaki pa motibu ku tur e vuelonan di un kompania di aviashon di djabièrnè a keda kanselá, tòg tabata un fin di siman ku hopi logro pa Orca.
Djabièrnè 16 di novèmber 2018 un delegashon di 20 persona (atleta i dirigente) a biaha pa Boneiru pa partisipá na un torneo di Waterpolo. Tur wega a kuminsá na ora i tur kos a kana manera mester ta!
E torneo, 3rd Bonaire International Water Polo Meet, a keda hungá djabièrnè dilanti di Parke Tului i djasabra i djadumingu a hunga na Noordpier.
Orca señor dama a gana tur su kuater weganan kontra di Baracuda’s. E skornan tabata:
djabièrnè atardi 12 pa 5, djasabra mainta 19 pa 3, djasabra atardi 14 pa 8 i djadumingu mainta 15 pa 5.
E ekipo di Orca tabata superior na esun di Boneiru.
Orca señor kabayero a gana tur su kuater weganan kontra di Baracuda’s. E skornan tabata:
djabièrnè atardi 22 pa 9, djasabra mainta 19 pa 2, djasabra atardi 13 pa 10 i djadumingu mainta 13 pa 4.
Den e di tres wega di kabayero, Boneiru a krese den e torneo i a sa di wanta e skor bon. Kompará ku e otro partidonan, e ekipo di Baracuda a sa di lusi hopi bon!
Ya ta di 3 aña kaba ku e dos ekiponan aki ta kompetí ku otro dos biaha pa aña. E aña aki e ekipo di Aruba tambe a djòin. Bo ta ripará ku e timnan ta bai dilanti i ku e nivel di waterpolo ta krese den nan. Bon trabou di Baracuda’s i Orca!
Direktiva di Orca ta gradisí tur atleta pa nan komportashon i prestashon, coach pa e gran trabou ku a desplegá promé ku e biahe i na Boneiru. Direktiva ta hopi gradesido na boso tur!!!!
Aki ta sigui un kompilashon di loke Swim Club Orca Curaçao a sa di logra for di Sèptèmber te ku novèmber di e aña aki:
07 te ku 09 di sept. 2018 interkambio den waterpolo U12 na Boneiru. Orca a gana 3 wega i pèrdè 1.
21 te ku 23 di sept. 2018 interkambio den waterpolo U14 na Boneiru. Orca a gana 3 wega i pèrdè 1.
19 te ku 23 di okt. 2018 interkambio den waterpolo U16 na Boneiru. Orca a gana 2 wega i pèrdè 2.
02 te ku 05 di nov. 2018 kompetensia den natashon na Aruba: Aruba Dolphins Invitationa. Orca su atletanan a sa di logra 7 medaya: 4 di bròns i 3 di plata . E atletanan a sa di drecha nan tempu.
10 di nov. 2018 kompetensia di synchro na Korsou: Banda Bou Splash National invitational 2018. Orca su atletanan a logra 8 medaya: 2 di plata i 6 di oro.
07 te ku 12 di nov. 2018 kompetensia di master na Repúblika Dominikana, NACA master. Orca su atletanan master a sa di logra 10 medaya: 6 bròns, 3 plata i 1 oro, e atletenan a sa di drecha nan tempu.
16 te ku 18 di nov. 2018 torneo di waterpolo Senior dama na Boneiru. Orca a gana tur wega.
16 te ku 18 di nov. 2018 torneo di waterpolo senior kabayero na Boneiru. Orca a gana tur wega.
Tur e disiplinanan di Swim Club Orca Curaçao a presta i duna lo máksimo. Hopi great i pabien na e atletanan.