Esaki ta para den un carta cu e directiva cu Stichting Voortgezet Onderwijs Aruba (SVOA) cu ta maneha Colegio Arubano, a manda pa Obispado y Representante di e Comision di Mayornan di Studiantenan di Colegio Arubano (OCCA). E reaccion ta relaciona cu e apelacion cu Obispado y OCCA pa e miembronan di directiva tuma nan retiro pa bienestar di Colegio Arubano y su studiantenan.
Den e reaccion SVOA ta bisa cu hustamente pa bienestar di e instituto educativo y su studiantenan no por entrega nan retiro y laga e instituto sin control y rumbo. Tampoco por para e procedura di buskeda di un rector, cu ta igual cu e procedura di 2018,y e hecho cu falta apenas un luna y mey pa aña escolar cuminsa. Rector y su team ta encarga cu e maneho diario na Colegio Arubano.
Den e carta SVOA ta nenga cu ta existi un “bestuurlijke crisis”. E directiva tin 4 miembro, di cual e minimo ta 3, tin rector interino cu ta guiando e scol. E retiro di e rector ta un derecho cu e persona cu tin pa tuma tal decision y e no a afecta e operacion di Colegio. Inclusive a traha un plan pa reapertura di e scol. Por a mira cu durante e pandemia tabatin un bon colaboracion entre school leiding y directiva, mientras cu no tabatin un rector.
Loading…
Reload document 
Open in new tab Directiva ta señala cu nan ta decepciona cu Obispado a saca conclusion y a forma un opinion inhusto sin cu a duna e directiva chens pa splica nan mes, of pa nan reacciona riba nan preocupacionnan. Obispado a cancela un reunion programa y OCCA a rechasa e invitacion pa reunion. Si di berdad tin un “bestuurlijke crisis”, e directiva ta bisa, e ora mester a probecha pa sinta y scucha kico e directiva tin di bisa.
Den e carta ta menciona cu Obispado no ta tene suficiente cuenta cu e operacion diario di CA y esaki ta keda proba den e peticion pa e miembronan retira, mientras cu dos di nan a keda nombra apenas dos luna pasa, y pa para procedura di solicitud pa un rector, mientras cu na augustus scol ta cuminsa.
Pero tambe ta recorda Obispado y OCCA cu nan tin simplemente un autoridad statutuario pa nombra e respectivo miembronan y no tin un derecho statutuario pa retira e miembronan ya cu e ta un autoridad cu ta den man di e directiva. Pa loke ta nombramento y retiro di e otro miembronan di directiva, OCCA y Obispado no tin tarea eyden ni autoridad.
SVOA ta cuestiona e ponencia di Obispado cu e mester ta un scol di creencia catolico siendo cu den su 60 aña di existencia a tuma studiante di tur creencia. Loke nan kier awo ta bay en contra di e maneho hiba pa 60 aña cu aprobacion di Obispado.
Ademas SVOA ta bisa di ta contento di Obispado su interes nobo den Colegio Arubano. “Nos a haya falta di bo pensamento y oracion durante menasa di “school shooting” na januari ultimo y durante e crisis di COVID-19. Ta hopi bon pa tin Obispado bek como partner ya cu esaki ta na interes di e scol.”
Y hustamente, nan ta bisa, debi na e puntonan menciona, nan lo no tuma nan retiro. “Porta semper ta hancho habri pa OCCA y Obispado y cu na interes di Colegio Arubano semper ta dispuesto pa sinta y traha hunto cu e dos organisacion aki.”
