Diasabra anochi tabata tin continuacion di campeonato di AVB ora cu e pumanan esta Sv Britannia Frisian Flag/Vitamalt a topa cu e muchanan di Madiki esta Riverplate. E alinacion di Sv Britannia tabata ta; Arthur Werleman, Carl Geerman, Rodymar Paesch, Carlos Caro, Glembert Kock, Nino Ulises, Renier Paraez, Luis Estrada, Jean-Marc Farro, Hugo Martina y Rafy Godoy. Den e prome 30 minutnan di wega Sv Britannia Frisian Flag/Vitalamlt a domina e wega completo y ta anota 2 gol trempan den wega. E prome gol a wordo anota pa Luis “Coco” Estrada cu ta bai laga ariba banda robes y ta fusila e keeper di Riverplate na di 7 minut di wega pa e 1-0. Ta na di 27 minut di wega ta e propio Luis Estrada cu ta bai laga atrobe banda robes y ta duna un voorzet pa Rhaf Godoy kende no ta basila y ta slice pa anota e di 2 gol pa Sv Britannia bai ariba 2-0. Na di 35 minut di wega Riverplate ta hana un free kick y aki ta unda cu Kendric Paulina ex-hungador di Britannia cu ta tuma e tiro liber na su cuenta y ta anota e gol di corta ventaha pa Riverplate y hasi e wega 2-1. Nos por menciona cu na di 22 minut di wega e defensa central di Britannia esta Paesch ta leciona na su hamstring y mester a bandona tereno. For di e momento ey nos por a wak cu e defensa di Britannia a perde confiansa y no tabata asina stabil mas. Den di dos tempo Riverplate a bin por la coma pa empata e wega y nos por bisa cu si no tabata pa Arthur Werleman cu a trese algun salbacion y stroba Riverplate di empata e wega. Cambionan cu Sv Britannia Frisian Flag/Vitamalt a hasi ta; Alex Moreno a drenta pa Rodymar Paesch na di 22 minut, Luis Murillo a drenta na lugar di Glember Kock na di 46 minut, Leyon Croes a drenta pa Hugo Martina na di 76 minut, Moises Castro a drenta na lugar di Alex Moreno na 76 minut y Wim Oosthoek a drenta na lugar di Rhaf Godoy na di 87 minut. Cu e score di 2-1 tambe refree de Leca ta caba e wega y asina Sv Britannia Total Finance ta bai cas cu e 3 puntonan y asina e pumanan ta acumula 7 punto den 3 wega. E proximo wega di Riverplate lo ta diabierna awor contra di Dakota y di otro banda Sv Britannia Frisian Flag/Vitamalt su proximo compromiso lo ta diasabra awor contra di Estrella.
