Aruba Airport Authority N.V. (AAA) ta sumamente contento di por a yama Surinam Airways su avion 737-700 bon bini na Aruba.
E avion nobo a yega Aruba Diaranson, 30 di Mei, 2018 pa 3:05pm cu un total di 101 pasahero abordo. E capacidad total di e 737-700 ta 128 asiento, incluyendo 8 asiento den business y 120 den economy. Despues cu recientemente e acuerdo di lease di e 2 avionnan 737-300 a termina, Surinam Airways a opta pa inverti den un avion mas optimal. E 737-700 ta e prome di su clase den SLM su avionnan y lo opera entre 6 destinacion incluyendo Aruba, Curacao, Trinidad y Tobago, Belem (Brazil), Guyana (Georgetown) y Miami. Surinam Airways actualmente ta opera for di Aruba pa Miami y Paramaribo y a transporta un total di 9,816 pasahero den aña 2017.
Na e momentonan aki Surinam Airways tin 2 avion cu ta opera buelonan den e region, e 737-300 y e 737-700 di cual un mas lo wordo añadi na October 2018. “E plan pa Surinam Airways ta pa sigui crece. Nos ta contento di por a yama bon bini na Surinam Airways su avion 737-700 y nos ta ansioso pa mas oportunidad den futuro,” asina Air Service Development Manager di AAA Sra. Jo-Anne Arends a expresa.
