Recientemente studiantenan di e facultad di Hospitalidad y Turismo (FHTMS) a forma parti di e programa di certificacion “Certified Incentive Specialist (CIS)”.
Studiantenan durante dos dia a siña e practicanan di e industria di gruponan incentivo. E programa di certificacion ta enfoca riba con un programa incentivo ta wordo diseña, kico ta motiva un persona pa alcansa un nivel mas halto den su trabou, y e impacto positivo cu un programa incentivo tin riba resultado di un organisacion.
Normalmente cada aña profesionalnan den e industria como miembronan di Society for Incentive Travel Excellence (SITE) rond di mundo ta reuni na un conferencia mundial durante un perdiodo di tres dia. E conferencia ta cubri varios tema educacional specifico na e industria di gruponan incentivo. Locual cu a hasi e evento aki unico ta cu e instructor di SITE, Sr. Jim Skiba bou invitacion di ECO DMS a bin Aruba especialmente pa hasi e programa cu e studiantenan di UA. E certificacion ta forma parti di e curso MICE Management bou guia di Sra. Jo-Anne Croes.
Pabien na e 19 studiantenan cu a participa y a completa e programa exitosamente: Karel Arends, David Carache, Marylaine Feliciana, Asanya Foster, Marrion Kock, Zarianni Larmonie, Zoë Loefstok, Jennifer Perez, Maria Perez, Alfonso Rey Canal, Sabina Rey Canal, Jeni de la Rosa, Edward Schoop, Victoria Sequera, Sarah van der Steen, Nathania Taylor, MaryJoan Wardlaw y Annabel Westerop.
Nos facultad ta gradici Maoreen Every, Director of Operations di ECO DMS y su team completo pa a presenta na nos studiantenan e oportunidad. ECO DMS a percura di comienso te final pa “make things happen”, y a crea un colaboracion admirabel entre partner nan den e industria di hospitalidad y turismo. Danki na Marriott Resort Aruba Stellaris Casino, Aruba Airport Authority N.V., Holiday Inn Resort Aruba, Elite Productions & Entertainment, ABC Tours Aruba, One Happy Photographer, Fofoti Tours & Transfers, Pelican Adventures y Hilton Aruba Caribbean Resort & Casino.
Decano John Wardlaw ta remarca cu: “Den un periode relativamente cortico nos partnernan di industria a bini hunto y hasi e programa posibel pa nos studiantenan. Programanan di incentivo ta genera mas cu 70% di e mercado di MICE (Meetings, Incentives, Conferences & Exhibitions) pa Aruba. E industria y nos facultad ta reconoce e importancia y a traha hunto pa sigui crea profesionalnan den e area di MICE. Nos meta como facultad ta pa identifica e necesidadnan di nos industria y prepara profesionalnan cu e conocimiento y abilidadnan necesario pa asumi rolnan di liderazgo den hospitalidad y turismo. Nos tin e ventaha cu nos isla mes ta nos universidad y projectonan cu e industria ta sigur fortifica e calidad di nos graduadonan drentando e area laboral. Un danki na tur cu a hasi e projecto aki posibel.”
Pa mas informashon di e programa por bishita www.ua.aw of www.facebook.com/UA.FHTMS
