Studiantenan di EPI unit economia, ta recaudando fondo pa un studiereis cu nan lo bay haci na Januari proximo.
E studiantenan ta specialisando nan mes den e area turistico y di mercadeo. E studiereis aki lo tin como destino New York. Na New York e studiantenan lo haya un miho bista con Aruba ta wordo promovi den exterior y nan lo haya diferente charla/workshops tocante marketing y turismo. Tur esaki nan lo por aplica despues den nan estudio y den futuro.
Un di e otro metanan di e studiereis aki ta pa e studiante siña organisa, planifica, desaroya caracteristicanan di liderazgo, maneha placa y traha den ekipo.
Pa yega na e fondonan necesario e studiantenan a bin cu e idea pa organiza un spookhuis den caya grandi. Asina di un manera divertido nan por recauda fondo y contribui na atrae publico den caya grandi. E spookhuis mes lo hiba como nomber: House of Torment. Pero door di e localidad di e spookhuis a dicidi di cuminsa ya for di Korteweg cargando e nomber: Nightmare on shortstreet.
Drentando den Nightmare on Shortstreet bo lo wordo dirigi pa House of Torment.
E actividad aki lo tuma lugar dianan 26, 27, 28 y 31 di October 2018. Riba dianan 26, 27, 28 e orario lo ta di 6 pm – 11 pm. Riba dia 31 di oktober e lo ta di 6 pm – 12am. Entrada pa e evento aki lo ta solamente AFL. 10,- pa persona. E ticketnan lo ta na benta riba e dia di e actividad mes den Korteweg of via e Facebook page Nightmare on Shortstreet House of Torment. Por manda un mensahe personal pa bestel ticket.
Durante e dianan aki Caya Betico Croes lo ta den ambiente di trick or treat. Lo tin diferente actividad pa henter famia.
E studiantenan di EPI Unit Economia conhuntamente cu AREA ta invita henter pueblo di Aruba pa bin bishita Caya Betico Croes y The House of Torment.
