Diadomingo mainta un video a cuminsa bay rond via wattsap di un ATM. A resulta cu ta ATM di CMB riba LG Smith Boulevard. Despues di dos ora cu e video tabata bay rond, a bay mira kiko ta pasando. 24ora.com na yegada a topa cu e situacion manera e video tabata ilustra na CMB Blvd. Ainda e cosnan tabata desmantela na e ATM.
Varios cliente tabata yega na e ATM y mira cu e machine no ta funcionando. Loke a keda straño tabata cu e localidad ta habri. Ningun hende di e banco of autoridad tabata presente despues di algun ora cu e video tabata bayendo rond. CMB mes tin patruya cu ta controla tur ATM cada tanto tempo hasta den weekend of marduga.
For di representantenan di CMB nan a confirma na nos cu ta seguridad mes a descubri tur cos. Ta nan a graba tur cos pero no sa kende a manda esaki rond te cu el a bay viral. E comentarionan ta cu ta haya straño dikon den e caso aki no a lock e porta y e lugar tabata manera e video tabata mustra.
E machine berdad ta out of order. Clientenan tabata yega y mishi cu e ekiponan di saca placa. Hopi evidencia a bay perdi. Asina mes no ta dificil pa yega na esnan cu a pone e ekiponan aki pasobra tin camera 24/7 pafo y paden. Kiermen esnan cu a arma e sistema di supuesto skimming tambe nan cara y nan voz por wordo reconoci. Segun CMB nan a informa autoridad riba e caso. Nos tabata tin contacto cu dos vocero di Polis durante nos mesun investigacion y ambos a bisa nan no sa di nada.
A yama gerente di CMB y no a coy telefon. A papia cu representante di mercadeo y nan no por a confirma si ta un video nobo of bieu. Mientrastanto via wattsap e video tabata bayendo rond constant.
Mas despues a logra haya contacto cu un representante di CMB cu a laga sa cu nan ta preparando un relato pa manda pa prensa informando kico tabata pasando.
