Studiantenan di e facultad di hospitalidad y turismo (FHTMS) di Universidad di Aruba (UA), como parti di nan curso di “Events Management”, ta organisa ocho proyecto pa comunidad den luna di april y mei. Mision di e facultad ta pa prepara studiantenan cu e conocemento y habilidad pa eherce e rol di lider den comunidad y pa ta conciudadanonan di caracter den e industria global di hospitalidad y turismo.
E proyecto di servicio comunitario ta un ehercicio cu ta permiti e ocho (8) teamnan di cinco (3-4) studiante aplica e conocemento acumula di e teoria pa planea, organisa y ehecuta un evento special pa recauda fondo pa un instancia den comunidad. E meta di e proyecto “Community Service Project: Special Fundraising Event” ta pa desaroya e conocemento y habilidadnan di e studiantenan, pero mas ainda motiva y involucra nan pa duna bek na comunidad.
Den e auditorio di UA e gruponan a presenta nan idea / concepto na representantenan di Aruba CEDE Aruba, ECO DMS y miembronan di diferente instancianan cu nan lo yuda. Nan presentacion a inclui informacion di e instancia, motibo dicon a scoge esaki, tipo di evento, con lo mercadea e evento, recurso cu mester pa ehecuta (boluntario, cuminda, fondo, y mas). E meta tras di presentacion tabata pa nan ricibi feedback ariba nan evento y pidi sosten pa por ehecuta esaki.
“Cu e proyecto aki kier logra pa e studiantenan pone den practica locual cu nan a siña durante e semester. Organisa un evento no ta algo facil, ta rekeri habilidadnan manera flexibilidad, creatividad, originalidad, bista pa detaye, iniciativa, maneho di tempo, comunicacion, resolucion di problema y mucho mas. Como meta adicional tin pa purba stimula mas boluntario pa nos comunidad.” Jo-Anne Croes docente di e curso ta subraya.
E facultad completo ta invita pueblo di Aruba pa bishita e diferente eventonan y sostene e studiantenan cu ta trahando duro y di curason pa comunidad.
April 23:
Impact Café: School Edition at EPI organized for Heart Centered Leadership Foundation – Team Leader Cristian
April 23 & 24:
Snack Box Sale for Donkey Sanctuary – Team Leader Jose
April 27:
Workshop Virtual | Ban Cosecha cu Hof’i Bario Rancho! For Stichting Rancho – Team Leader Elena
May 1:
Snack Box Sale for Luna Foundation – Team Leader Elselyn
May 7:
Online Raffle for Fundacion Pa Nos Comunidad (FPNC) – Team Leader Jayen
May 8:
Online Gaming Event for Telefon pa Hubentud – Team Leader Kiwar
May 8 & 9:
Food & Toy Drive for Casa Cuna, Imeldahof & Centro Famia Criansa – Team Leader Michelle
May 9:
Online Raffle for Fundacion Respetami – Team Leader Jilianne
Facultad di Hospitalidad y Turismo di Universidad di Aruba ta reconoce e contribucion unico y strategico di e industria di turismo pa e desaroyo di Aruba y Caribe. Pa mas informacion di e programa por bishita nos na www.ua.aw of via facebook @UA.FHTMS
