E siman aki ta siman di Reclasserings. A tuma full e siman aki pa pone enfoke riba e trabao cu Reclassering ta bin ta haciendo pa añas. Pero tambe pa haci pueblo di Aruba un tiki mas conoci pa loke ta e proyectonan cu Reclassering ta brinda na su clientenan.
Segun Edelyn Lindor, Trahador Social na Stichting Reclassering en Jeugdbescherming Aruba, un di e proyectonan ta mentorenproyect, caminda cu ta match mentornan boluntario cu hobennan y asina aki yuda nan logra nan meta di bida como tambe laboral.
Tur hende cu hues comisario, fiscal of minister di husticia pone bao di guia di Reclassering, pa un tempo defini, ta ricibi guia.
Pa loke ta mentorenproyect , e hobennan cu ta den e proyecto aki ta bao di guia di Reclassering. Si e hoben ta haya un trahado social, y si e trahado social ta mira cu ta necesario pa match un mentor cu ne, pa cierto di e metanan cu e hoben tin, ta haci esaki.
E ta palabr’e hunto cu e coordinadora di e mentorenproyect. Asina aki ta bay over pa haci un matching. Den e matching ta bin p’adilanti por ehempel kico ta e meta di e hoben mes, kico e kier logra y desea.
Y mirando cu hopi biaha e hobennan ta menor di edad, tambe ta acerca e mayornan of tambe ta forma parti di e dialogo entre e mentor cu e hoben, pa ora cu haci e matching.
Tin cu agrega cu e proyecto aki ta bezig cun’e for di 2014. E ta un proyecto cu tin basta aña existente. Tin mentor caba y tin hopi storianan exitoso caminda cu mentor a trece cambio den bida di varios hoben.
Awor aki entre e mentornan existente, mirando e situacion di COVID-19, ta bezig ta manteniendo contacto cu e hobennan via telefon of Whatsapp pa asina minimalisa e contacto personal.
Normalmente nan ta topa cu e hoben un biaha pa siman, haci actividad cu e hoben. Si ta pa busca trabao of e hoben tin algo di scol cu e lo kier pa e mentor ta parti di dje. Esaki awo no ta posibel door di e situacion di COVID-19, pero tin cu bisa si cu ta danki na e mentornan cu tin den e proyecto cu asina mes ta keda mantene e contacto via di telefon of via di Whatsapp cu e hoben.
Na juli cu a pasa a tene un campaña cu a resulta sumamente exitoso, mirando cu 27 persona a aplica pa bira mentor aspirante. Nan tin cu bay door di un procedura di seleccion y tambe training pa nan haya mas conocemeto di e doelgroep cu ta trahando cu ne.
Ta un doelgroep cu hende tin miedo di nan. Pero nan tin nan aspectonan specifico pa nan. Sinembargo ora cu ta mira cu e mentor tin e pasenshi, e tin e gana di yuda otro hende, bo ta mira hopi biaha cu ora cu nan drenta den training, e calidad di e mentor ta sali bin p’adilanti.
Asina ta mira cua mentor lo por match na cua hoben.
Stichting Reclassering t’ey pa resocialisa personanan cu a haya nan mes den problema cu husticia pa nan reintegra den comunidad.
Tur persona merece un di dos oportunidad pasobra tur hende por comete un eror den nan bida. Pero ta loke nan haci despues cu nan a comete e fout, ta bay conta.
Reclassering ta traha cu mas instancia pa duna guia na e cliente y ta un tarea di comunidad pa por yuda e clientenan aki pa nan por bin bek den sociedad y no comete mas hecho castigabel.
