Den nomber di e barionan concerni, Stichting Parkietenbos kier a pone atencion riba nan prioridad memey di e discusionnan cu ta tumando luga. Aña pasa dia 30 di september e fundacion a reuni cu Minister Lopez-Tromp y su departamentonan, pa scucha kico ta e plan pa dump, incinerator y maneho di desperdicio y medio ambiente en general.
E minister awe no t’ey mas, sinembargo gobernacion ta continua. E miembronan di e fundacion y habitantenan; Parkietenbos, Mahuma, Simeon Antonio, Bucutiweg y Wayaca ta wardando ki dia e promesanan haci ta bay bira realidad. Tin cu tuma decisionnan clave pa soluciona e desastre ambiental di dump y e demas contaminacion di medio ambiente cu ta tuma luga den e area. E fundacion kier sa, ki dia ta stop di kima na dump y cera e sitio, manera cu PAHO a urgi Gobierno.
Pero awo ta papia tocante WEB pa bay over na gas y ta menciona solamente e aspecto economico den e discucion y a lubida e aspecto humano. Stichting Parkietenbos a yega di reuni cu WEB riba e tema. A pone nan na altura di e sufrimento cu e habitantenan di e barionan ta pasa aden tur aña ora cu biento cambia.
Recientemente e fundacion a entrega mas di 3000 firma na gobierno urgiendo pa soluciona Ser’i Teishi, stop di kima sushi na dump, cera e luga y alabes soluciona e contaminacion di huma di WEB Aruba. Tur aña for di luna di juni pa november durante e temporada di horcan cu biento cambia, e habitantenan ta sufri enorme di e molesternan aki. Nan ta haya enfermedad cronico y hasta por ta fatal. “Tanten cu bo no ta drumi of lanta mainta den e barionan, cualkier persona no sa den ki sufrimento e habitantenan ta pasa aden,” segun e fundacion.
Tin biaha den oranan di anochi e habitantenan ta lanta sofoca p’e huma y holo malo cu ta bay den direccionnan di e casnan den e vecindario. Esaki ta debi n’e cambio di direccion di biento pa luna largo. Pues ya ta laat, ta lihe mester haci pa soluciona e desaster ambiental aki cu ta afecta e barionan pa decada. E pueblonan di bario merece di hala rosea di aire limpi, e ta un derecho humano!
