Aña 2020 tabata un sorpresa pa tanto Stichting Musica y pa tur e musiconan. Segun Edwina Werleman, presidente di Stichting Musica, a encontra un crisis general cu di berdad por bisa cu a afecta e sector musical y di entretenimento.
A pone cu mester a tuma hopi norma na cuenta, keda safe. No por tabata tin ningun actividad, ni tocamento ni bailamento. Esey a causa cu musiconan a keda practicamente paralisa y sin trabao.
No obstante esey tin cu bisa cu a habri e aña si manera nada. A habri e aña cu festival di Aruba Caiso & Soca Monarch na su luga y exitoso. Por a sinti caba durante di e preparacion di e festival aki, cu Aruba tabata confronta su mes cu dificultad pa por a haya partner.
Por bisa cu partnernan di semper tabata t’ey cu Stichting. Asina cu el a pasa, y net a cuminsa planea, mirando cu ta traha semper delanta pa e siguiente aña, e crisis a bin.
Awor aki tur cos ta para. Aunke cu e musiconan no a para keto. A reuni cu e musiconan, trece e bandanan hunto y asina combersa cu nan pa haya nan sentimento di con nan kier pa sigui cu e futuro di Aruba Caiso & Soca Monarch pa 2021.
Mayoria kier un festival y ta bisa cu nan ta dispuesto pa coopera, nan ta dispuesto pa produci, nan kier nan canticanan zona y esey ta trece cu ne lo tin un festival, pero solamente mester corda riba tur normanan cu tin cun’e.
Ta premira kisas cu lo ta bay tin un festival cu ta bay ta kisas den su prefinalnan virtualmente. Esey ta te na e momentonan aki. Pero atrobe hopi cos por cambia y e cambionan no ta den man di e Stichting.
No ta keda mas cu bisa cu e momento ta dificil, pero ya sa caba ki direccion musico y artistanan kier pa e Stichting bay. Tambe a concentra kico tabata fin di aña. Fin di aña ta di e gaitero y tipiconan. Asina a crea un produccion cu a pasa den aire diadomingo cu a pasa y a yam’e “E serenata Navideño” unda cu a duna oportunidad na gaiteronan pa por presenta nan produccionnan di 2020 y a bay sumamente bon.
Stichting Musica ta orguyoso pa pone esaki riba pia. Tambe tabata tin esnan cu a colabora manera AMA y Departamento di Cultura. Ta formula cu a carga aña 2020 y cu e plannan awor aki, con nan lo sigui pa 2021.
Expectativanan pa 2021
Stichting Musica ta premira cu kisas lo bay tin actividadnan virtual. Prefinal cu por tuma luga virtualmente. Esaki ta encera Aruba Caiso & Soca Monarch. Por bisa tambe cu nan tin planea pa haci mas produccion, manera cu a haci pa e Festival Navideño.
Ta bin diferente temporada y no kier laga nan pasa voorbij sin brinda produccionnan pa artistanan di tur genero y tene nan asina activo
Edwina Werleman ta gradici e musico, pa su pasenshi y tambe sa cu e momento ta dificil, pero kier pa semper no perde e esencia di locual ta trece musica den cada hogar di nos hendenan na Aruba.
Werleman ta asina orguyoso di a mira cu artistanan a produci, con bandanan a sigui produci, den grandi of den chikito a pone nan mes na minimo tocado. Sa cu e crisis a dal duro, pero wak’e como lesnan siña y prepara y keda creativo, haciendo asina aña 2021 e miho cu lo por trece.
Stichting Musica ta sigui wak cos positivo y ta sigui traha pa bienestar pa e musico y artista na Aruba.
