Awe e resumen di Departamento di Salud Publico (DVG) ta mustra cu diripiente e casonan nobo a dal un salto basta grandi. For di 17 pa 30. No a duna un splicacion si esaki ta basa riba un kluster of no.
Segun resumen di awe, 11 persona a recupera, a registra un total di 30 caso nobo di COVID-19, di cual 3 ta no-residente, cantidad total di testnan ehecuta ayera ta 439 ‘positivity rate’ local riba dia di ayera ta 21%).
Activo tin awe 173 caso, cantidad di fayecido relaciona cu Covid-19 ta 47.
Hospital ta informa cu tin un total di 7 persona interna di cual 1 ta den Cuido Intensivo y 6 isola riba piso general.
Mientras cu otro parti mundo paisnan ta den lockdown aki na Aruba por celebra un Pasco cu famia. Ta depende di comportacion di cada uno di nos, si nos lo por celebra un aña nobo tambe sin restriccion, e informe di DVG ta bisa.
Nan ta haci un yamada na hoben, adulto hoben y adulto mayor pa sigui cuida. Sea consciente cu COVID t’ey. Na Aruba tin 173 persona positivo isola pero no sa cuanto persona por tin e virus y ta canando rond sin sa cu nan ta transmitiendo esaki.
