Pa di dos aña Stichting Hope ta celebrando su fiesta di carnaval y e aña aki, cu ayudo di algun stagiaire di colegio EPI, nan a logra haci’e mas grandi y bunita pa nan clientenan. E evento a cuminsa pa 3’or y mey di atardi, unda cu a elegi nan reina, prins y pancho.
Rosa Kelly a keda corona como Reina di Stichting Hope, sigui pa su runner up, kende ta den persona di Jacintha Croes. Como prins a resulta di ta Dolfi Donker y Pancho ta Mario Croes. Despues pa 5’or di atardi, e fiesta a wordo anima pa un brass band cu a keda toca te cu 6’or di atardi, treciendo tremendo ambiente. Esaki sigur tabata un evento exitoso pa e fundacion, cu a trece un alegria di Carnaval cerca e grandinan.
