Pa prome biaha, Scol Caiquetio a organisa un actividad carnavalesco cu a uni tur scol di e bario di Brazil, riba diabierna, 9 di Februari.
Comision organisatorio di Scol Caiquetio a tuma e iniciativa pa invita e otro scolnan di bario, pa bin hunto pa un jump in riba nan tereno di scol, hunto cu Mama Mia Buleria.
Scolnan invita ta Sint Michael, Cristo Rey, Tarcicius y Jelly Kids.
No menos cu 400 mucha, hunto cu nan maestronan di scol y algun mayor pa tira bista riba e muchanan, a sa di bin gosa y pasa dushi.
Tema cu a wordo scogi, ta Emojis, unda cu e muchanan a traha y decora nan trahe.
Meta di Scol Caiquetio ta pa uni e bario y scolnan. Ta spera cu den futuro por organisa mas actividad similar pa asina estrecha e lasonan familiar y escolar.
E comision organisador ta gradici Buleria cu desde prome instante tabata dispuesto pa bin y topa pa e scolnan. Tambe ta gradici na e maestronan di tur e scolnan pa nan esfuerso y dedicacion pa yuda, den un tur forma, pa un exitoso actividad, pa cera e ultimo siman di Carnaval.
