Stichting BOB Aruba a tene un conferencia di prensa pa motibo cu den e ultimo tempo a sali den varios medio, informacion encuanto di cancer di pecho. Den e luna di october tin atencion extra pa cancer di pecho rond mundo. Esaki Diantha Nüesch, PR & Marketing di Stichting BOB a bisa den un conferencia di prensa. E tabata den compania di dr. Vanessa Lovert Williams, Radiologo coordinado.
El a splica cu den e informacionnan cu tur rason ta enfatisa e problema creciente rond di cancer di pecho y e importancia pa controla esaki preventivamente. Sinembargo den algun di e comunicadonan aki ta cuestiona e uzo di mamografia (röntgen) pa e screening y si e ta adecuado pa deteccion di cancer di pecho. Algun bes ta implica cu e uzo di mamografia ta te hasta dañino.
‘E tipo di informacion aki ta preocupa nos, pasobra e screening a base di mamografia ta internacionalmente mira na e momento aki como e standard absoluto. Nos di Stichting BOB, ta conduci nos screening pa cancer di pecho for di e base di mamografia y cu esaki ta sigui e programanan di entre otro Merca y Europa.”
‘Nos tin contacto frecuentemente cu e dokternan, specialistanan medico na Aruba cu ta envolvi den diagnostico y tratamento di pashentnan cu cancer di pecho y nan opinion encuanto di e uzo di mamografia pa deteccion y tratamento di cancer di pecho y si esaki ta cuadra cu nos pensamento y forma di traha.”
Diantha Nüesch ta bisa cu pa medio di mamografia por detecta e cancer di pecho na tempo ainda. Di e manera aki ta hisa e expectativa di bida di e pashentnan. Danki na e metodo di mamografia por detecta e cancer di pecho hopi mas tempran compara cu un ‘echo’ den cual ta mas dificil pa haya den un fase hopi tempran.
Importante pa enfatisa ta e hecho cu e mamografia ta e unico metodo cu ta busca calificacionnan micro prome cu esakinan desaroya den un tipo di cancer. Cu ningun otro metodo cu no ta mamografia, te cu awe, e calificacionnan micro aki por wordo detecta.
Stichting BOB Aruba ta tene alerta na tur momento pa cualkier otro cambio y tambe actualisacion mundial pa loke ta trata e tipo di metodo cu ta uza pa samina pecho cu ta aproba cientificamente.
“Hende muher entre 45 y 75 aña di edad ta ricibi un invitacion di Stichting BOB Aruba cada 2 aña pa conduci un screening. Lamentablemente algun hende muhe no por of no ta duna oido na e invitacion. E porcentahe cu ta presenta ta varia rond di 40%. E organiascion ta purba pa hisa e porcentahe aki,” Diantha Nüesch a bisa.
dr. Vanessa Lovert Williams, Radiologo coordinado, a splica cu e screening tin te cu aworaki anualmente entre 50 pa 60 cu ta referi despues pa mas saminacion. Di e 4 of 5 personanan aki, un cu ta saliendo for di Stichting BOB Aruba ta keda detecta cu un tipo di cancer di pecho y tin cu sigui cu tratamento.
Mayoria di casonan di cancer di pecho(70% te cu 80%) no a keda detecta ainda door di e screening preventivo di Stichting BOB Aruba.
Den e casonan aki e pashent ta haya molester di e pecho, y ta acudi na su dokter di cas, kende na su turno ta sigui e proceso. Mayoria bes ta detecta ora cu e cancer di pecho ya ta den un fase mas avansa. Esaki ta loke nos kier preveni, p’esey e screening preventivo t’asina importante.
“Nos ta desea pa e mayoria di casonan di cancer di pecho juist keda detecta via e screening preventivo di Stichting BOB Aruba. Esaki por nifica cu den e casonan aki di cancer di pecho ta keda detecta den un fase mas tempran.
Si detecta e cancer di pecho tempran por duna e pashent mas chens pa tratamento y e chens di sobrevivencia ta bira mas grandi. Esaki ta loke na final ta conta. “Nos por logra esaki door di aumenta e porcentahe di hende muhenan cu ta acudi pa e screening. Aumenta e porcentahe di hende muhe cu ta bin pa e screening por logra unicamente si den e comunidad Arubano tin confiansa den e programa di Stichting BOB Aruba y den e mamografia cu ta uzando pa screening. “Nos di Stichting BOB Aruba y tambe e docternan hunto cu e specialistanan medico cu ta responsabel na Aruba pa e diagnostico y tratamento di e pashentnan cu cancer di pecho tin tur confiansa den e screening preventivo a base di mamografia.”
Screening preventivo riba base di mamografia ta e standaard absoluto. Na e momento aki no tin un otro medio alternativa pa considera. ‘Nos ta confia cu e mensahe awe en berdad por yega na tur habitante di Aruba den nan mayoria y mas importante cu e contribui na logra e confiansa.”
