St. Paulus School ta bay haci un marcha cultural diabierna, dia 15 di Maart. Segun cabesante suplente y encarga pa organisa actividad cultural den cuadro di Himno y Bandera, Juffrouw Marcia, esey ta eigenlijk loke a siña e muchanan durante di e simannan cu a pasa. Cada klas mester a scoge un tema, e ora nan ta bay elabora riba dje y bay traha e ora pa bay caya cun’e.
Informacionnan cu nan haya nan ta traha rond di dje. Por ehempel tin un klas cu traha rond di e tema piscado. Aki nan tin cu haya tur informacion y e ora nan ta bay traha nan cosnan pa sa kico ta e piscadonan di Aruba.
Ta bay tin diferente tema, manera no Moneda, Dande, pasobra na St. Paulusschool, tin e reina di Dande Infantil. E ora e klas ey a scoge pa bay cu Dande.
Tambe nan tin e prome habitantenan di Aruba, nos indjannan. Tin tambe e cunukeronan. E aña aki, debi cu aña pasa a haci’e na un manera espontaneo, y el a bay hopi bon. A bay un tiki mas organisa e aña aki. A organisa diferente scol na San Nicolas, cual un di nan ta Colegio Santa Teresita, cu a responde na e invitacion.
E aña aki Colegio Santa Teresita ta join St. Paulus School pa e parada tambe.
Hopi mucha
Segun Juffrouw Marcia, parti mainta nan lo ta habriendo e dia cantando e Himno, manera cu tur aña ta haci. Colegio Santa Teresita lo cana bin e scol pa habri e mainta tambe y despues riba tereno di scol lo prepara tur cos. Ta bay tin tres soundsystem cu musica tipico. A purba di haya drumband pa habri cun’e, manera aña pasa, pero no a logra. Riba e speelplein ta prepara, despues sali bay den Pastoor Hendrickstraat. Ta purba di coy e ruta di Carnaval di Mucha, pero cu tiki cambio. Na Rayo di Solo lo cana bay den Caya Dick Cooper, sigui den B v/d Veen Zeppenfeldstraat, Lagoweg, pasa K&G y bin bek den Pastoor Hendrickstraat y caba na scol. E maestronan lo wak pa e muchanan y tambe tin mayornan cu ta yuda pa wak pa e muchanan riba caya. Tur cos ta ok. E muchanan ta sigur. Aña pasa a bay super bon y e muchanan ta comporta bon. Nan meta ta pa disfruta y trece e cultura pa e publico di Aruba.
Aporte di mayornan
Ta haci un apelacion na tur esnan cu tin algo. Scol tambe ta traha cosnan cu e muchanan. No ta tur cos ta algo cu nan ta uza of ta cla caba. Aña pasa a haya un grupo di baile cu a fia pañanan tipico como apertura grandioso. Tin hopi mucha cu a participa den paradanan cultural y cu ta miembro di grupo di baile. Tur mucha cu por tin nan paña cultural, por bin cune y tambe a pidi mayornan cu ta encarga cu gruponan pa fia scol pañanan cultural. Mayornan ta all out den esaki. E mayornan semper ta cla. Aña pasa a pidi contribucion di cosnan di come, pa despues di parada. Tabata un locura cu hasta mester a parti na Trai’ Merdia. E aña aki a bisa cu lo tene tiki mas low profile y cada klas si ta pidi pa ora nan bin bek, nan por celebra den nan klas cu cumindanan tipico, pasa bocanan tipico. Pero mayornan semper ta cla pa yuda scol. For di un cu yama, bo ta pidi, e yudansa ta yega.
Invitacion pa pueblo
St. Paulusschool ta spera tur hende, bin para banda di caminda. E muchanan ta sali pa 8’or y mey di diabierna mainta for di st. Paulusschool riba e ruta ya menciona. Ta pidi publico pa bin apoya e muchanan, bin apoya e cultura di Aruba, pasobra esey ta loke ta di nos. Bin apoya conhuntamente cu Colegio Santa Teresita.
