Despues di dos aña sin por a celebra Carnaval, e gruponan a probecha di e tempo aki pa nan a prepara di trempan p’e celebracion di Carnaval 69.
Asina tambe Touch Of Brazil (TOB) a organisa nan prome evento p’e proximo temporada di Carnaval, door di corona nan Sra. T.O.B. 2023, den persona di Faridi Werleman-Daou. Lissette Chung, lider di grupo TOB p’e ultimo binti añanan.
PREPARACION
Ta faltando dos siman pa e eleccion di Sra. Carnaval tuma luga, nos di 24ora.com a acerca Sra. Carnaval di TOB Group, den persona di Faridi Werleman-Daou, encuanto su preparacion pa cu e eleccion aki.
Faridi a indica cu nan ta hopi druk cu e ultimo preparacionnan pa cu e eleccion. Nan ta traha riba speech, riba su show, etc. p’asina pa ora cu e subi e escenario riba Plaza Libertador Betico Croes, e lo ta bon prepara.