“Pueblo di Aruba: Nos a roga, suplica pero nos mester constata awe cu ICU ta yen, B3 ta yen. Por tin mil y un cama bashi, por pone tent, pero no tin personal”, asina specialista di pulmon, dr. Selene Kock a informa den fin di siman riba su pagina di Facebook. E ta un di e dos specialistanan di pulmon cu nos tin na Aruba, despues cu dr. Alex Schwengle a bay traha na Boneiro. Bisando esey tin menos man pa maneha e avalancha di pashentnan cu Covid yegando hospital e ultimo simam aki.
Antes por a scoge entre Alex Schwengle, Selene Kock of Caroline Becker ora ta contagia cu Covid y desaroya retonan cu pulmon. Acerca a manda busca mas dokter di Merca, cu experiencia den e ramo aki y cu a trata pashentnan di Covid caba pa asina tin mas man pa atende e ola di covid cu a asota Aruba. Pero, nan a bay bek y como tal awo ta dos specialista a resta pa atende cu tur e pashentnan cu ta drentando un tras di otro atrobe den hospital, di cual algun di nan basta malo caba.
“Hulanda, AMI, VWS, tur nurse y dokternan a bandona nos isla. Dus, ban tene distancia 1.5 m, uza mondkapje surgical atrobe y laba man y uza handsanitizer. Si bo tin cualkier sintoma, tuma contacto cu bo dokter di cas y keda cas, isola bo mes den bo camber te ora bo test ta conoci. Ora bo test positivo, por fabor keda bo cas y isola bo mes, no bay trip! Drumi riba bo barica, come saludabel y haci ehercicio”, asina e specialista a recomenda.
E ta referi den e prome parti cu e dokternan, e specialistanan y e nursenan cu a bin di Hulanda y Merca pa yuda Aruba a bay bek caba. Pues e capacidad di cama den e unidad di cuido intensivo a bay bek na 6 cama, di cual tin 4 yen caba cu pashent di Covid. Si sigui asina, anto e ora pa e siman cu ta bin aki nos lo ta den problema serio na hospital pa cu capacidad pa atende e pashentnan cu mester mashin pa por hala rosea. Banda di esey, cantidad di accidente y otro sucesonan tambe ta yena e cambernan den cuido intensivo cu otro pashentnan cu no necesariamente ta cu Coronavirus.
“Mortonan cu ta surgi e luna aki ta di pashentnan cu NO a vacuna y hasta adultonan ful saludabel a fayece di Covid. Rectificacion; Un total di 95% di e pashentnan interna den hospital, NO a vacuna. Pandemia di esunnan NO VACUNA! Por fabor, si bo no a acudi pa bo vacuna, haci esaki. Pero AWO tin problema, dus por fabor, cuida bo mes, bo famia, amistadnan y sernan keri”, asina dokter Kock a suplica na henter e pueblo di Aruba.
